Ххувшаврил кьини Дагъусттаннайн парадирттай гьуртту хьун бувкIун бия республикалул кьатIув яхъанахъимигу. Совет Союзрал кIийла Виричу АхIмад-Хан Султаннул гьайкалданучIан бавтIсса архсса регионнаясса хъамаллуравух бия Тула шагьрулиясса Зарема Аьлиевагу.

Ванил ппу Икрам ТтурчIиял шяравассар, нину Халисат – Бярнихасса. Зарема Москавливсса Дагъусттаннал Культуралул центрданул ва Мариян Илиясовал цIанийсса «Дараччи» фондрал филиалданул дуллалисса давур­ттавух ца яла чялишну хIала буххаймур душри. Сайки гьарцагу ккалли дансса давриву бутIа бишин ва Тулалия бучIайссар Москавлийн. Бияйссар госпитальлай хъин хъанахъисса, щавурду дирсса аьралийтурачIан. Цуппагу хIакин бухьувкун, медициналул ка-кумаг аьркинсса ишираву мудангу хьхьичIунмай шайссар.
Ниттил мазрайгу, миллатрал бучIантIимунийгу дакIцIуцIаву дусса Зарема Аьлиевал гьар шинах цилва чулуха ЦIуссалаккуйн «Илчи» кказитругу чичайссар. Ванил жяматрай аьтIий, Ватангу, Ватандалул агьлугу ххирану дурсса давуртту АллагьначIа хьхьичIунну лякъиннав тIий, хъамалудуш хIисаврай ца-кIива махъ уча тIисса тавакъю бувссия. Заремал укун увкунни:
– Жува чув бухьурчагу, Шагьру-Виричу Тулалий, ягу хъуншагьру Москавлив, ягу аьзизсса Дагъусттаннай, жунма мудангу дакIнийссар жула ппухълу жунма рахIатсса оьрму дузал буван талай бивкIшиву. Ттул ниттил ппу, Кьурбаннул арс Кьурбанов МахIмуд, ванал кIиягу уссу, МахIаммад-Расул ва ХIусайн-Рамазан, лавгун бивкIссар аьрайн, Ххувшаврищал зана хьу­ссар. Буттал ппу Шайхалиев Оьмаригу лавгссар аьрайн, ванан, мяйжанссар, лахъину талан къабагьссар, кIусса щаву дирну, шавай зана хьуссар. Ттул дакIниву мудангу вайннайнгу, циняв фронтовиктурайнгу барчаллагьрайсса асарду буссар. Ва байрандалул кьимат чIалай ххарину бура. Ва щаллагу дунияллий ца яла хьхьичIунну, кьиматрай дикIан аьркинсса байранни. Ххувшаву ларсминнава хIакьину так-туксса бакъа ливчIун бакъар. Лавгцири дакIний битаву – жуйвасса буржри.
На цалчинна АхIмад-Хан Султаннул гьайкалданучIасса мероприятиялий гьуртту хъанахъисса. ЧIявусса агьлу бавтIун бия, хъуннасса ххаришиву дия оьрчIру чIявусса чIалай. ЛичIинува асар хьунни СВО-лий арсру ливтIусса ниттихъахсса къулагъас, на вайннущал цинявннущал кIул хьура. Шайхха оьрмулуву кьинирду, ссятру хъинчулий дакIний личIансса, яла-ялагу тикрал хьун хьурдай учинсса. Ххувшаврил байран шинай цал дайсса духьурчагу, ва кьинисса пашманшивугу хIаласса, нахIу-тIааьнсса лахIзарду тикрал хьуну ччисса хьунни. Ва ххуллухьсса буттал аьрщарайнсса аьрххи Ххувшаврил байрандалул ярг бувсса хьунни. Ниттищал ца классраву дуклай ивкIсса техникалул элмурдал доктор АьбдурахIман Халилов ккавккунни, цаймигу хIурмат лавайсса инсантал бия, «Дараччилул» душру бия. Лак­рал цашиву ккаккан дувансса, гьарцагу чулуха лавайсса даражалийсса даву дия.
ПатIимат Рамазанова