Бюхттулсса Ххувшаврил 80 шинал юбилейран хас дурсса, лахъа-хъунсса даражалийсса парад хьунни Каспийск шагьрулул майданнив.

Ххувшаву ласлай, талай бивкIми дакIнин бичин бувкIун бия ДР-лул бакIчи Сергей Меликов, ДР-лул ХIукуматрал председатель Аьбдулмуслим Аьбдулмуслимов, Дагъусттаннал парламентрал спикер Заур Аскандаров, властьрал органнал вакилтал, Хъун дяъвилул ветерантал Ибрагьим-Паша Садикьов, Муса Багьауттинов ва Юрий Пет­рухин, хасъсса аьралий операциялул гьурттучитал. Вирттаврал ниттихъул щябивкIун бия парадрал трибуналий бусравсса хъамаллурал дянив.
Аьрасатнал Виричу Ма­хIаммад Исбакиевлул душ Мишельгу карав щябивтун, трибуналий парадрах уруглай ия Сергей Меликов.
Парадрай каялувшиву дуллай ия Каспийскаллал флотилиялул аьралий гарнизондалул командирнал хъиривчу, контр-адмирал Анатолий Долгов. Парад кьамул дурна Каспийскаллал флотилиялул контр-адмирал Олег Зверевлул.
Аьдатравун дагьсса куццуй, Ххувшаврил байран дайдирхьуна Каспийскаллал флотилиялул хIаписартурал Аьрасатнал Федерациялул ва Ххувшаврил ттугъру гьаз баврийну. Хъирив тархъаншиврул цIаний жанну дуллуминнал аьпалун баян бувна минутIрайсса пахъ багьаву.
Майданнив тIайланнасса эфирданувух ккаккан увна Ххувшаврил байрандалущал агьали барча буллалисса Аьрасатнал президент Владимир Путин.
– ХIакьинугу хIакьмур ва тIайламур жула чулийри бусса. Щалагу билаят, цинявппагу инсантал цахьуну, хасъсса аьралий операциялий гьуртту хъанахъи­сса аьралийтурал чIарав бацIлай, шайсса кумаг­ру буллай бур. Мудангу пахрулий бикIан аьркинссару Бюх­ттулсса Ххувшаву гъан дуллай бикIсса яхIлувсса буттахъал ирсирая. Вихну ура уздансса ирсирал наслулул уттигу Ххувшаву ласунтIишиврийн, – увкунни Владимир Путиннул.
Парад тIитIлай, махъ лавхъуна Сергей Меликовлул:
– Хъун дяъвилул цIарал щавщи къабивсса кулпат бакъахьунссар. Тай шиннардий ща­ллусса кулпатрува хушрай дяъвилийн буцара тIий букIлай бивкIссар. Дагъусттанная Ватан дуруччин лавгссар 180 азара инсан. Миннавату бачIиксса зана къавхьуссар. Бюхттул­сса Ххувшаврил байран жула билаятрал тарихравугу, халкьуннал дакIурдивугу абадлий личIантIисса кьинир. Ва байран душманнаща лахIан бан къавхьусса жула халкьуннал кьянкьашиврул лишанну хъанахъиссар. ХIакьину жува барчаллагьрай дакIнин бичлай буру дяъвилул цIараву ва къинттуллух къучагъну талай бивкIми, дяъви къуртал хьуну махъсса шиннардий хIукумат ччаннай дацIан дуллай бивкIми. Буржлувссару жува тархъаншиврул цIаний жанну дуллусса аьралийтурал аьпа абад буллан, – увкуна ванал.
Дагъусттаннал бакIчинал барчаллагь баян бувна хIакьинусса кьини хасъсса аьралий операциялул иширттаву къучагъну аьра­лий буржру бартбигьлагьисса дагъусттанлувтурайн.
Хъирив Ххувшаврил байран барча дуллалисса махъ лавхъуна Юрий Петрухиннул. Ххувшаву ванал хьунадаркьуну дур Польшанаву. Ветеран лайкь хьуну ур Жуковлул, «За доблестный труд в Великой Отечественной войне 1941-1945 гг.», «За оборону Кавказа», «За победу над Германией в Великой Отечественной войне 1941-1945 гг.» тIисса орденнан ва медальлан.
Каспийск шагьрулул майданнийх аьралий музыкалухун дачин дурна Каспийскаллал флотилиялул, АьФ-лул ФСБ-лул Погрануправлениялул, Росгвардиялул, УФСИН-далул, Дагъусттаннал таможнялул, Юнармиялул, «Движение Первых», ДГТУ-рал Аьралий кIулшивуртту дулаврил центрданул подразделениярттал кьюкьри. Гьашинусса парадрай, Сергей Меликовлул сипталийн бувну, гьуртту хьу­нни Ккавкказуллал халкьуннал кьянкьашиврул ва къучагъшиврул лишандалун ккаллисса бур­ттигьалтрал дивизия. Ссавруннайх лехлай дия Ххувшаврил ва Аьрасатнал Ттугъругу лавхъсса аьралий вертолетру. Вай дия яла къизгъинми талатавуртту нани­сса кIанттурдайн тIайла ду­ккайсса вертолетру.
Хъирив майданнийх ларгуна бронетранспортерду, бронеавтомобильлу ва цIанасса аьралий техника. Техникалул колонналул каялувчину ия Каспийскаллал флотилиялул материал-техникалул щаллушиндарал командующийнал хъиривчу Михаил Мироненко.
Парадрал колонналувух цалчин бия бусалдаравун багьсса реактивный артиллериялул БМ-13 «Катюша». Парадрай дия ляличIисса аьралий-хьхьирил техника ва ракетный комплексру.
Хъирив бачин бувна хасъсса аьралий операциялул шартIирдай зузи байсса, 2022 шинал «Ремдизель» заводрал итабавкьусса «АХМАТ» тIисса уттизаманнул бронеавтомобильлу.
Майданнийх мукунна ларгуна 1941-1945 шиннардийсса Хъун дяъвилул аьралийтурал формардавусса кьюкьа.
Байрандалул колонналуву дия БТР-70 ва БТР-80 бронетранспортерду, ракетный комплекс «Бал», мобиль лаборатория «Корвет-С», ГАЗ 23302 «Тигр» ва «Патруль» автомобильлу, зенитный установкар­ттащалсса «Камаз-5350» автомобиль, БЛ-820 проектрал анаварсса бущилул штурмовой лодкарду.
Парад къуртал хьуна аьралий гарнизондалул оркестрданул «День Победы» тIисса балай учаврийну.
Имара Саидова