Вай гьантрай Къазахъисттаннал хъуншагьру Астаналий хьунни чани бакъа­сса спортсментурал дянивсса Дзюдорал чемпионат. Шикку гьуртту хьунни 38 билаятраясса 300 спортсмен. 46 килорал кIушиврийсса спортсментурал дянив 1-мур кIану бувгьунни Ккуллал райондалийсса Ваччиял шяравасса Кьасимлул душ Аминат Оьмаровал. Ванил ларсъсса ххувшаву ккалли дан бучIир яхI-къириятрал ва чувшиврул эбратран.

– Аминат, ина вила кьянкьа-кьурчIишиврийну ва захIмат ххирашиврийну исват бунни вила хьхьичI бивхьусса мурадру бартлаган баврил ххуллий цичIар къадацIайшиву. ЧIа тIий ура вин цIуллушиву, гихунмайгу хъунисса тIайлабацIуртту. КIулну бикIу, Дагъусттаннал агьали виява пахрулий бушиву, – тIий чивчунни Республикалул бакIчи Сергей Меликовлул Телеграм-каналданий чемпионка барча буллай. Дагъусттаннал бакIчинал личIинува барча­ллагь увкунни, Аминат Оьмаровал гьунар ялун личин буллай, ванищал зузисса тренер Зайнаб Гаургашвилихьгу.
– Пахрулий ура Дагъусттаннал спортсментурая, вайннал хьхьичIуннайшивурттая, дунияллул халкьуннал соревнованиярттай гъалгъа тIий бушиврия. Зува язи бувгьусса ххуллийх мукунма сивсуну, кьянкьану бачияра, – увкунни Сергей Меликовлул.
Шиккува кIицI лаган, ва чемпионат хъанахъиссар 2028 шинал Лос-Анджелесрай хьунтIисса Паралимпий тIуркIурдай гьуртту хьунсса спортсментал язи бугьлагьисса этапну.
Уттигъанну Москавуллал областьрай Раменск шагьрулий хьусса чани бакъасса спортсментурал дянивсса Дзюдорал чемпионатрай Аминатлул 1-мур кIану бувгьуссия. Шикку ххув хьуну, ва лайкь хьуссар Спортрал мастернал цIанин. Ва цила яхI бушиврул, кьянкьа-кьурчIишиврул цIуллу-сагъминнаяргу гьарица ишираву хьхьичIунну бур.
Аминат зий бур МахIачкъа­лалив Муххал ххуллул азарханалий массаж бувуну. Ванил бувай классикалул, спортрал, лимфодренажный, рефлекторный, косметический, точечный, мюрщисса оьрчIалсса ва цаймигу журалул массажру.
Яруннал мушакъат хьусса ппурттуву машхул хьуну бур ва куклу атлетикалул, голболданул, дзюдорал, шашкардал, шахматирттал, мини-футболданул спортрахун. Аминатлул усттарну кIунурдай ва жанграй суратругу щащай. МахIаттал-хIайран бувссар ванил цимилгу республикалул, щалвагу Аьрасатнал даражалийсса шахматирттал, дзюдорал ва жанграй щащаврил соревнованиярттай хьхьичIунсса кIанттурду бувгьуну. Аминатлул кIилва 1-мур ва 2-мур кIану бувгьуну бур шахматирттал турнирдай.
Массажисткану зий 2 барз шайхту, Кисловодскалий хьусса массажистътурал конкурсрайгу ванил 2-мур кIану бувгьуну бур. Цуппа гьуртту хьусса конкурсирттай, чемпионатирттай ванил мудан хьхьичIунсса кIанттурду бугьай. Аминатлул бур музыкалул чулухунмайссагу гьунар.
Виричунал ххуллийсса бушиврун ккалли бан бучIир ванил оьрмулул ва захIматрал ххуллу.

Имара Саидова