Оьрмулул 73 шинаву аьпалухьхьун лавгунни чIярусса шиннардий Вихьуллал дянивмур даражалул школалий оьрчIахь дарсру дихьлай ивкIсса учитель, щалагу жяматрал дянив бусравсса инсан, дакI-аьмал авадансса чув-адамина, ХIасаннул арс Чаринов Чарин.
Чарин увссар Вихьуллал шяраву ТIантIанхъал ХIасаннул ва Салтуравхъал Кьуранмусил дянив 1952-кусса шинал.
Буттал шяраву мяйва класс бувккуну махъ, Буйнакскаллал педучилищагу бувккуну, Чарин цаппара хIаллай зий ивкIссар учительну Ахъушиял райондалий. Мичча лавгссар армиялийн бурж лахъан. Армиялия учIайхту, зий уссия Ккуллал райондалий Къяннал, Хъювхъиял шяраваллаву. Яла, Вихьуллал школалий зунсса кIану шайхту, цала буттал шяравун зана хьуну, дунияллия лавгсса кьинилийн ияннин шикку зий уссия тарихрал дарсирдал учительну. Ванал заочнайну къуртал бувссар Дагъусттаннал педагогикалул институтгу. Чариннул мукунна дишайссия географиялул дарсругу.
Чарин, куртIсса кIулшивуртту дусса учитель акъагу, цува каялувшиву дуллалисса классирттал оьрчIру Дагъусттаннал тарихращал кIул буллай, гай экскурсиярттай бувцуну занай, чIявусса кIанттурдайн ияйссия. Ва цимилгу, райондалул КIулшиву дулаврил управлениялул чулуха хьуннав, Министерствалул чулуха хьуннав, грамотарттан, дипломирттан лайкь хьуссар. Лайкь дурссар Чариннул «Аьрасатнал кIулшиву дулаврил отличник» тIисса цIагу.
Чарин уссия мукуна жяматийсса давурттавух чялишну гьуртту шайсса чув. ЧIярусса шиннардий Вихьуллал шяраваллил кIанттул Депутатътурал советрал председательнугу ивкIссар.
ДакI хъинсса, гьалмахтураву авкьусса, чIявусса дустал-гьалмахтал бусса инсан ия Чарин. Ванал дарсру дирхьусса оьрчIру, школа къуртал бувну махъгу, ванайн оьвтIий, байраннащал барча уллай, дакIния гьан къаитлай бикIайва. Ва ахиратрал хьусса кьинигу, хъиривми кьинирдайгу ванах жижара буван бувкIсса инсантурал ахир-зума дакъая.
Хъуннасса дард-хажалатгу кIидачIлай, дакIнийхтуну жижара буллай буру Чариннул кулпатрахь Сиясатлухь, арснахь Шакирдухь, душнихь Кьуранмусихь, ссурваврахь Жумяълухь, Аьйшахь, Зайнаблухь ва махъсса цинявппагу мачча-гъанминнахь.
Ххаллилсса хасиятрал заллуй Чарин, ина тачIавгу жул дакIурдива къауккантIиссара. Ина паракьат хьуний нур дизаннав, ЗанначIан гъансса кIанай кIану хьуннав. Амин!
Вихьуллал жямат
Вай гьантрай, ирглийсса Ххувшаврил байран кIицI лаганнин къаивтун, дунияллия лавгунни Венгриянавусса дяъвилул иширттал гьурттучи, партиялул лавайсса къуллугъирттай зий ивкIсса ххаллилсса лаккучу, АьбдурахIманнул арс Мямма МахIаммадов.
Ва увну ур 1936-кусса шинал январь зурул 14-нний КIувурдал шяраву. 1955-ку шинал Гъумучиял дянивмур даражалул школагу къуртал бувну, аьралуннаву къуллугъ бан лавгун ур. 1956-ку шинал октябрь зурул 28-нния ноябрьданул 12-ннийн бияннинсса чIумуву гьуртту хьуну ур Венгриянал билаятрайсса революциялийн къарщисса бунт ккуччу давриву. Аьралуннаву къуллугъ бувну увкIун махъ, 1959-ку шиная 1973-ку шинайн бияннин, зий ивкIун ур Каспийскалийсса «Дагдизель» заводрай слесарь-механикну, инженерну, ведущий инженерну, хъунама инженерну. 1966-ку шинал къуртал бувну бур Ленинградуллал кораблестроительный институт. 1973-ку шинал тIайла увккун ур Буйнакскаллал агрегат заводрайн. Шикку зий ивкIун ур 2004-ку шинайн ияннин хъунама инженернал хъиривчуну ва Партиялул комитетрал хъунаману. Ва ивкIун ур Буйнакскаллал коммунист партиялул горкомрал бюрорал ва Дагъусттаннал коммунист партиялул обкомрал пленумрал членну. УвчIуну ивкIун ур Буйнакскаллал горисполкомрал депутатну, шагьрулул Ветерантурал советрал председательнал хъиривчуну, Агрегатный заводрал Ветерантурал советрал председательну.
ЗахIматрал ххуллий Мямма АьбдурахIмановичлул ккаккан увну ур цува куртIсса кIулшивуртту дусса, даража лавайсса, жаваблувсса, захIмат ххирасса пишакар ушиву.
Ва ия Щалагу Союзрал Изобретательтурал ва рационализатортурал обществалул член, коммунист захIматрал ударник, ЗахIматрал ветеран. ЗахIматрал ххуллийсса ккаккиярттахлу лайкь хьуну ур ХIурматрал грамотарттан ва медальлан.
Партиялул ва хозяйствалул давурттай ванал ккаккан бувну бур сакиншинначинал гьунар, хIурматрай ва бусраврай ивкIун ур коллективраву.
Мямма ия гьарица чулуха марцIсса, жаваблувсса зузала. Ванайн тапшур байва яла захIматми масъалартту. Мямма АьбдурахIманович ва кIулминнан мудан дакIний икIантIиссар.
Ва аьпалул шаврил кьурчIишивугу кIидачIлай, жижара буллай буру ванал кулпатрахь Светланахь, душваврахь Анжеллахь, Ххадижатлухь, Жамилахь, Зулайхатлухь, ссихь Шарипатлухь, махъсса циняв гъан-маччаминнахь. Имандалий лавгун хьуннав, рухI алжаннул ххари даннав.
КIувурдал, Гъумучиял жяматру, дустал, гьалмахтал
Жу, Вихьуллал дянивмур даражалул школалул коллектив, жула дянив ххюцIалунниха лирчусса шиннардий учительну зий ивкIсса
Чаринов Чарин ХIасаннул арс
ахиратрал шаврийн бувну, хъуннасса кьурчIишивугу кIидачIлай, жижара буллай буру Чариннул кулпатрахь, оьрчIахь, уссур-ссуннахь. Цал бунагьирттал аьпа баннав.
Вихьуллал школалул коллектив
Хъуннасса кьурчIишиву кIидачIлай, дакIнийхтуну жижара буллай буру Рамазан Фаталиевлухь ванал нину
ПатIимат Фаталиева
аьпалул шаврийн бувну.
Алжаннул ххари баннав, рухI бигьаний дишиннав, гьав нурданул дуцIиннав, махъсса цинявннал оьрмурдай барачат бишиннав.
Дагъусттаннал музыкантътурал союзрал цIания Аьрасатнал искусствалул лайкь хьусса ишккакку Хан Баширов.
