Ларгсса ххуллункьини Семендердайсса 58-мур школалий хьунни республикалул рувхIанийсса ирс-ххазина, авадансса культура яшаврил ххуллийсса «Балайлул ва хиялданул хъаттирдай» тIисса Миллатирттал культуралул фестиваль.

Ва гьар шинах дувайсса шагьрулул фестивальли, циняв милл­а­тирттал агьлу гьуртту шайсса. КIюрххила школалул майданнив миллатирттал лаххиярдавусса дуклаки оьрчIру ва учительтал бия цала-цала колорит ккаккан дуллай. ОьрчIру синааьрщарая тIахIунттив дуллай бия, душру – бартбисуртту щащан лахьлай. Гьаннайсса, канил пагьмурду ялун нанисса никирангу ккаккан буллалисса майданну бия. Художник Амирхан МахIаммадовлул Дагъустта­ннал культуралун хас дурсса суратирттал выставкалий тамаша бувмигу чIявуя. Бия миллатирттал дукрарду дирхьуну къур бувсса столлу.

Лакралмур майдан хъун буван бувкIун бия ччергъилттущал Лакку мазрал учительтурал ассоциациялул модератор ПатIимат Аьлиева. Ва школалий лакку мазрал дарсру дихьлахьисса, 1-мур ЦIувкIратусса Зина Оьмариева бия гьашинугу лакралмур майдандалул сакиншинначи. ДукIурагу ваний дуссия хIадуршиндарал хъар.
«Жу, мукьвагу лакку учительница, хIала бувххун, лажин кIялашиву дуварду. ХIу­сайрамазанова Зиттанат, Аьлиева Ирина, ХIажиева ПатIима лагма лавгун, хIадуршиндаралсса буллай бивкIру. Школалул директорналгума жулмур даву ябацIансса душиву кIицI лавгунни. ХIарачат буварду цайми миллатирттаяр махъун къабагьну, сантирай ва дюхъан дурну даву дуван», – увкунни Зина Оьма­риевал.

Ва байрандалий ттун бакIрайн багьунни цамургу лакку мазрал учительница, 1-мур ЦIувкIратусса Фиалка Шамилова. Ва зий буссар МахIачкъалаллал 42-мур школалий оьрус мазрал ва лакку мазрал дарсру дихьлай. «Ттун гьар шинах гъира бикIайва ва фестивальданийн биян, амма, алхIаткьини дарсру дуну, гьан къашайва. Гьашину бувкIра ттулва коллегащал. Хъинну асар хьунни, школалул хIаятравун буххайхтува, зюннав-дачIулул чIунихун пагьламан лахълахъиминнал гьунарду. Буттал шяравалу дакIнин дагьну, ххарисса асардал дакI дурцIунни. Фестивальданул программагу авадансса дия. Иттав макь дучIансса сценкарду ккаккан бунни оьрчIал дяъвилул тема аьч дуллалисса. Ниттил мазурдихасса назмурдугу ххуй дирзунни, 27-мур школа гьуртту хьу­нни назмурду дуккавриву. Ялун нанисса никиран жулва нитти-буттахъул ссаха зузисса, ци ду­ллалисса агьлурив, цукунсса культуралул, багьу-бизулул, канил пагьмурдал заллухърурив ккаккан буллалисса фестиваль дур. Хаснува дакI ххари хъанай дур миллатирттал лаххиярдавусса мюрщиминнай. Майда­ннайх буклакийни, лакку учительницахъулгу чалагъайрттугу дирчуну, бузмардаву ябацIанну бия. Укунсса фестивальлу ни­ттил мазру, аьдатру ядаврил ца чаранни», – увкунни Фиалка Шамиловал.

ПатIимат Рамазанова