Литературалул институтраву А. Тахо-Годил цIанийсса Педагогикалул институтрал (Дагъусттаннал научно-исследовательский институт) оьрус мазрал ва литературалул секторданул хъунмур, Аьрасатнал Чичултрал союзрал Дагъусттанналмур отделениялул каялувчи, Ккавкказуллал чичултрал клубрал президент Миясат Муслимова гьуртту хьунни Москавливсса щалагу Аьрасатнал лагрулийсса элмийсса конференциялий.

«Дунияллул кIилчинмур дяъви – Буттал кIанттул цIанийсса Хъун дяъви дунияллул ва Аьрасатнал халкьуннал литературалуву» тIисса цIанилу ва конференция хьунни Максим Горькийл цIанийсса Литературалул институтраву Миллатирттал литературалул къатлул элмулул ва культуралул центрданул кабакьаврийну. Конференциялул дайдихьу дуллалисса махъ лавхъунни институтрал ректор, профессор Алексей Варламовлул. БавтIцириннал гъирарай вичIи дирхьунни Миясат Муслимовал Дагъусттаннал Чичултрал произведениярттаву дяъвилул тема аьч даврил хIакъиравусса докладрах.Тиккува ххал бивгьунни миллатирттал литературалул хIакъиравусса масъаларттугу.

Ванил бувсунни Литературалул институтрал ректоратрал цихьва тавакъю бувшиву, чичаврил гьунар бусса 5 жагьилсса инсан лякъин, ми институтрал миллатрал группалувун кьамул аншиврул. Ва иширах къулагъас дувара ниттил мазурдил учительтурал ва школардал директортурал, нитти-буттал. Агар чичрулул гьунар бусса, дуклан гъирасса оьрчIру бухьурча, Миясат Муслимован баян бувара.
Дуклан бувхминнан яхъанансса общежитие булунтIий бур. Щаллагу дунияллийх цIа ларгсса Литературалул институтраву кIулшивуртту куртIгу, цIакьгу дуллансса тIайлабацIур зух ялугьлагьисса.

ПатIимат Рамазанова