Апрель зурул 25-нний Редукторный поселокрай шадлугърал тагьарданий, лакрал миллатрал язисса арсру ва душру гьурттуну тIивтIунни машгьурсса лингвист, языковед, профессор Эса Аьбдуллаевлул цIанийсса Лакку мазрал центр. Лаккуясса хъамаллурая тIайла хьуну, мяйжаннугу чIявусса агьлу бавтIун бия центрданул цIа чирчусса ула чIирай ларчIусса къатрал хьхьичIун. ОьрчIи-чIюлу бувну, хIадур бувну бия центр бусса дарвазагу.

Мероприятие дачин дурсса Дагъусттаннал Чичултрал союзрал лакрал секциялул каялувчи Супиян Оьмаровлул кутIану бувсуна ва центрданул сиптачи ушиву Дагъусттаннал Жяматийсса палаталул председательнал хъиривчу Ссапарбаг Аьбдуллаев.

«ДукIу август зуруй «Инт» кафелуву хьуссия лакку маз бухлаган къабитан цукунсса ххуллурду-чаранну ккаккан аьркинссарив ххал бигьлагьисса батIаву аьлимтал, чичулт, жяматийсса ишккаккулт, лакрал идарарттал вакилтал гьурттусса. Тикку гьаз бувсса агьамсса масъаларттавух бия укунсса центр чара бакъассар тIиссагу. Лакрал чIарав мудангу ацIайсса Ссапарбаг Аьбдуллаевлул ва ххуллухьгу цува чIарав ацIан хIадурну ушиву бувсуна, бакIрайн лавс­на центрданун цува заллусса помещение булун. Къатта булаврицIун хъунмасса гъирарай зий ивкIунни ва давриха, бакIуйн дуккан дунни. Шиву аьркинну бия ремонт дуван, кабинетрал дизайн дуван, инвентарь, мебель машан ласун, баннерду дуван, канцтоварду ва цаймигу аьркинмунил дузал бан. Вай гьарзатралссагу бу­нни. Вана жува хIакьину ва центр тIитIлай», – увкунни ванал.

Ссапарбаг Аьбдуллаевлул кIицI лавгунни, хIакьину лакрал хьхьичI бавцIусса масъаларттава ца яла къювумур, агьаммур бушиву миллатрал маз ябаву. Барчаллагь увкунни лакку мазрал ва миллатрал культуралул кабинет чIюлу буван хъунмасса хIарачатрай зий бивкIсса Супияннуйн ва лакку мазрал учительница ПатIимат Аьлиевайн. Барчаллагь увкунни шайкун проектрал чIарав бавцIусса ва мудангу миллатрал бучIантIимуний дакIцIуцIаву дусса «Инт» кафелул хъунмур Саидат Кьурбановайнгу. Бувсунни ва центрданул директорну зунтIишиву лакку мазрал педагогнал даврил биял­сса опытгу бусса, лакрал тарих, культура, литература, гьарзат ххуйну кIулсса ПатIимат Аьлиева. «Жу ва центр тIитIарду лакку маз лахьхьин ччисса гьарманан. Ци оьрмулул инсан ухьурчагу, группарду бувну дихьлантIиссар дарсру», – увкунни ванал.

ПатIимат Аьлиевал бувсунни Эса Аьбдуллаевлул хиял бивкIшиву Лакку мазрал центр тIитIин, ванан 90 шин хьусса вай гьантрай центр тIитIавугу, ванал аманатран хIисавсса мурад бартлагаврин ккалли хъанахъишиву. «Центрданий лакку мазрал дарсру шанма зуруйсса украссар. Гихунмай бурганну ци иш бикIайрив. Амма, буккарча кулпат, жун жулва оьрчIан лакку маз лавхьхьуну ччиссар, багьа буллансса каши жул дакъар тIисса, шану къалавхъуну мукунминнангу лахьхьин буллан хIадурну бура. Ттул оьрмулуву ва хIакьинусса кьини ца яла ххаримур кьинир, укунма ххарину буссияв цалчинсса лакку мазрал диктант дурсса кьинигу», – увкунни ванил.

ПатIимат АьлиевацIун лакку мазрал дарсру дихьлантIий бур жагьилсса учительница Жамила ХIайдаевагу. «Ва центр тIитIаву лакку мазгу, культурагу, аьдатгу ядавриву бутIа бишинсса давур», – увкунни МахIачкъала шагьрулул Депутатътурал Мажлисрал председатель Марис Илиясовлул. Центрданул дарвазалийх бавхIусса ятIул лента кьукьин тапшур бунни ванайнгу, Ссапарбаг Аьбдуллаевлуйн ва ПатIимат Аьлиевайн. Ванил яла хъамаллуран экскурсия бу­нни центрданул кабинетравун. Шиккува кIицI лаганна, центрдануву бушиву лакрал автортурал луттирду, лакку мазрай­сса журналлу ва кказитру. ЧIиви-хъунсса библиотека, хIасил. Дия лакрал чичултрал суратру дусса стендру, тарихрая бусласи­сса стендру, личIи-личIисса баннерду. Партардай бивхьуну бия цIусса, пар-пар тIисса лакку мазрал букварьду. Дия ручкарду, тет­радьру.

«Ва так лакку маз лахьхьин буллалисса центр бакъар, лакрал оьрмулул иширттан ва датардан хасну мероприятиярттугу дуллантIиссар, вания лак­рал культуралул хIакьсса кюру хьунтIиссар», – увкунни Супиян Оьмаровлул.

Лакрал райондалул администрациялул вакил Макьсуд Макьсудовлул райондалул хъунама Юсуп МахIаммадовлул цIанияту бавтIциригу барча бувну, ванал цIаниятусса Барча­ллагьрал чагъар буллуна Ссапарбаг Аьбдуллаевлухьхьун. «Жагьилтураву, оьрчIаву ми­ллатрал тарихгу, мазгу лахьлансса гъира чIалай буний, мукуминнацIун кабакьинсса укунсса центрдугу тIитIлай буний – буссар миллатрал бучIантIимур», – увкуна жяматийсса ишккакку Магьди Айналовлул. Ссапарбаг Аьлиевлухьгу, ванал лагма лавгун хIарачатрай зий бивкIцириннахьгу барча­ллагь тIисса ихтилатру бувна Дагъусттаннал халкьуннал чичултрал – Мирза Давыдовлул, Хизри Илиясовлул, Лакрал театрданул худрук Бадрижат МахIаммадхIажиевал, Гъумучиял школалул директор Соня Макьаевал, Мариян Илиясовал цIанийсса «Дараччи» фондрал хъунмур Гульшан Хасаевал, А. Тахо-Годил цIанийсса Педагогикалул НИИ-рал директорнал хъиривмур, Аьрасатнал Чичултрал союзрал региондалул каялувчи, чичу, публицист Миясат Муслимовал, ДГТУ-рал кьатIаллил билаятирттал мазурдил кафедралул каялувчи, чичу, профессор Нажават Абуевал, Минтрансрал отделданул хъунама Зиябуттин ХIажимирзаевлул, республикалул Национал библиотекалул директорнал хъиривмур Сарат Жабраиловал, «Гъази-Гъумучиял тухумру» луттирал автор, бусравсса хъуначу МахIаммадхIажи Къаплановлул, фото-художник, коллекционер Каламадин Кьурбановлул ва цаймигу махъ нанисса инсантурал. Вайнналгу кIицI лавгуна, ва центрданувун лакку маз лахьхьин заназими ялу-ялун чIяву хъананссар тIисса умудрай бушиву, хъиндайдихьу дуршиву. Ца зумату кунма, бусрав-барчаллагьрай бия вай, цала миллатгу, миллатрал багьу-бизугу ххирасса, ххирашиву ца уттигу хъинсса даврийну ккаккан дурсса Ссапарбаг Аьбдуллаевлуйн.

Музыкалул программагу хIалану гихуннайгу лахъи ларгсса мероприятиялий ихтилатру буллалимигу ххарину кIицI лаглай бия Эса Аьбдуллаевлул дакIниймур щаллу хьушиву, лак мяйжаннугу Лакку мазрал центрданух мюхтажну бивкIшиву. Магьди Айналовлул кIицI лавгсса куццуй, укунсса центр тIитIаву жуйвасса буржну чIалай бивкIшиву. Шадлугърал батIаву цала балайрдайну чIюлу дурна Дагъусттаннал халкьуннал артист Шамсуттин Къаплановлул.
ЦIухху-бусу буван ччисса ухьурча, чичинну центрданул номердугу: 8-938-785-04-78; 8-928-046-50-70.

ПатIимат Рамазанова