Буттал кIанттул цIанийсса Хъунмасса дяъвилул фронтрайсса кьянкьану бацIаву ва къизгъинсса талатавуртту, так ца жула Ватандалул агьалинал цIанийсса къадиркIссар. Инсаниятрал, щалвагу махлукьатрал кьадар та дяъвилия хъар хъанай бивкIссар. Та дяъвилул саллатIталгу – Ххувшаву ларсмири, миннал аьпалул хIурматгу жучIава лахъну буссар. Никирая никирайн биян буллай, кьиматрай ягу бувантIиссар.

Ватан дурурччуминнавух ттул чIирисса КIулушацIрал шяравасса мачча-гъанссагу бу­ссар: ппу МахIаммад Рамазанов, ванал уссурвал АьбдурахIман ва СалихI Оьмаровхъул, буттарссу Написат ва ттулла нину Таибат Ссунгъурова. Буттарссу ва нину къанаврду дуклай бивкIссар къинттуллухмур фронтрай. Вай циняв дакIнин бивчуну, урчIва-ацIва хха чичлай ура аьпалул хIурматран.
Буттал кулпатраву шама уссу ивкIссар: ппу цува, АьбдурахIман, СалихI ва шанма ссу: ХIабибат, Аьйшат, Написат. Дяъви байбишин хьхьичI, хъунама буттау­ссу АьбдурахIман Къазаннай Химико-технологический институтраву дуклай ивкIссар.

Дуккавриву итххявхсса ттул ппугу ва институтрал рабфакрайн дуклан увхссар. Дяъви байбивхьуссар, буттал ва буттауссурваврал хияллу, мурадругу, та ппурттувусса цинявнналсса кунма, гьалакIу хьуссар. Буттан дурагу 18 шин диркIссар. Аьрайн къистта хьусса уссихь хъунама уссу АьбдурахIманнул увкуссар: «Анавар мауккара. Шавай иян насу, нитти-буттал ялун иян. Дяъвилийн гьаннин, миннан ца арсвагу ххал хьун аьркиннихха. Насу, нитти-буттал дакIру рахIат дува, вилмур чIунгу дучIантIиссар». Нину-ппугу ккавккун, ттул буттан гацIана аьрайн ачин ччан бивкIссар. Буттауссил тIийкун, цала чIун дучIаннинвагу къаавцIуну. Буллуну аьрзагу, 1941 шинал июль зуруй лавгссар Лакрал райондалиясса цалчин хушрай наниминнавух. 70-мур армиялул 838-мур полкраву Польшанавун, Чехословакиянавун ияннин талай ивкIссар. Ххувшаву хьунадаркьуссар Германиянаву. 1945 шинал гъинттул, ппу усса часть Японнащалсса дяъви нанисса Южно-Уральский аьралий округрайн руртссар. Ппу занахьуссар шавай 1947 шинал, ряхра медаль диркIссар ванал хъазамрай пар-пар тIий, миннувух «За отвагу», «За боевые заслуги», «За победу над Германией» ва цаймигу.

Рамазановхъал агьлулия аьра­йн лавгцириннава так ца ппур зана хьусса. Майорнал чиндалувусса АьбдурахIманнул 1945 шинал февраль зуруй жан дуллуссар. Дяъви байбиши­ннинма Летчиктал хIадур байсса училище къуртал бувсса СалихIлул, хъунама лейтенантнал чиндалуву жан дуллуссар 1942 шинал. Жанну кьурван дурссар куявтурал, Щайхамирдул ва Кьурбаннулгу. Мюрщи­сса оьрчIащал ялгъузну ливчIссар ссурвал. Оьрмулул 16 шиннагу хьун дурасса Написат тIимур ссу, МахIачкъалаллал зума-къирагърай танкардан бару бансса окопру дуклай бунува, къашай хьуну бивкIуссар.

Аьрая увкIсса буттан 24 шин диркIссар. Мунал хъачIунттайн дагьссар хъуннасса хъар. Бугьарасса нитти-бутталсса, ссурвавралсса ва миннул оьрчIалсса, уссурваврал кулпатиртталсса бан багьлай бивкIссар. ЧиваркI ливтIуну, цувалу личIарчагу, ппу яхIлувну увкссар тай ишир­ттава. ЗахIмат ххирашиву ва хьхьичI бивхьусса мурадрайн хъит тIутIаву мунан кабакьу бансса кумагчитал хьуссар. Дугу-дурккуну, зий, захIмат буллай, цаланалссагу, цайнма бувксса чилссагу буллай, лайкьну оьрму бувтссар.
1947-ку шиная 1959-кусса шинайн ияннин зий ивкIссар Лакрал райондалул РК ВЛКСМ-рал секретарьну, партиялул инструкторну. Мукуна Избербаш шагьрулий КПСС-рал Окружкомрал секторданул хъунаману, КПСС-рал обкомрал инструкторну. 1959 шинал увчIуну ивкIссар ЦIуссалакрал райондалул партиялул райкомрал кIилчинма секретарьну, 1961 шинал тIурчарив, Лакрал райондалул партиялул райкомрал цалчинма секретарьну. 1967 шиная 1981 шинайн ияннин зий ивкIссар РСФСР-данул Заготовкарттал министерствалул Дагъусттаннай­сса ПаччахIлугърал инспекциялул каялувчину. Ва бивкIссар Шярава­ллил хозяйствалул дуки-хIачIиялул ва заготовкарттал ялувбацIаву дувайсса инспекция. 1992 шин дучIаннин зий ивкIссар ДАССР-данул Министртурал советрал приемнайлул хъунаману. Буттал захIматран лайкьсса кьимат бивщуна хIукуматралгу. Ванал дия мадарасса хIурматрал грамотар­тту КПСС-рал обкомрал, Совминдалул, РСФСР-данул Заготовкарттал министерствалул дуллусса.

Хъамакъаитайсса ппу, АхIмадлул арс Рамазанов МахIаммад ххуйсса цIагу кьариртуну лавгуна дунияллия 1995 шинал. Гьарца шяраву кунна, КIулушацIгу дацIан дурну ду­ссар, аьрая зана къавхьуминнан­сса гьайкал. Таний чирчуну ду­ссар зана къавхьуминнал ва зана хьуминнал цIарду. Ми циняв лавгссар дяъвилул цIаравун. Ватандалул бакIрачIан кьини дуркний, миннал ярагъ кIунттил бувгьу­ссар. Ми сайки циняв жагьил­сса бивкIссар, дазу-зума дакъа бу­ттал аьрщи, Ватан ххирасса. Му хIакьсса ччаврил ва Ватандалул бюхттулсса бучIантIимунийн вихшала дуну бивкIнутIийри та бала-мусиватсса дяъвилуву кьянкьану бавцIуну, Ххувшаву ларсъссагу. Лахъисса бивкIссар му Хъуннасса ХхувшавричIансса ххуллу. Жулва ттаттахъал, ппухълуннал ва хъуними уссурваврал му ххуллу чувшиврий бивтссар. Мири Ххувшаву ларсми!

Оьмари Рамазанов, КIулушацI
Таржума ПатIимат Рамазановал