ЦIуссалакрал райондалий «БивкIу бакъасса полк» акциялул лагрулий буслай бур Буттал кIанттул цIанийсса Хъунмасса дяъвилий фронтран кумаг буллай бивкIсса ва дяъви къуртал хьуну махъ райондалул даража гьаз бан захIмат буллай бивкIсса хъанния.
Мукунминнавасса ца бур ЦIуссалакрал райондалул цIанасса бакIчи МаматIи ХIамзатовлул нину МахIаммадлул душ ПатIима. Бувну бур ва Лакрал райондалий, ТтурчIайнна зунттуй дирхьусса ТтурчIиял шяраву. Укун буслай бур ПатIима цила оьрмулия:
– На бувну бура хъудугьул кулпатраву. Жул ппу ччяни дунияллия лавгун, мукьва оьрчI ниттил канихун багьну бия. На кIилчинмур бияв. Качар тIимур ссу ттуяр хъунмасса бия. Ттул хъиривсса уссин Аьлин мукьра шин дия, чIанма-чIивимур ссийн Муслиматлун – дахьва 7 барз.
ЗахIматсса зунттал шартIирдай оьрчIан ччяни хъуни хьун, ичIаллил, хозяйствалул хъар лахъан багьайва.
Укун ПатIимангу чIивину бунува ниттил кумагчи хьун багьну бур. Дяъвилул шиннардий цала кулпатращал Бухардай ялапар хъанахъисса ниттиуссийл ХIасаннул вай Буйнакскалийн бизан бувну, цала къатрай бивтун бур. Нину зун диркIун дур трикотажрал артельданий аьралийтуран янна дурухлай. ПатIимагу цищава шайсса кумаг буллан бикIайсса бивкIун бур ниттин. Лавгун бивкIун бур къанаврду дуклангу.
– Дяъвилул чIявусса баларду бувцунни инсантурал бакIрачIан: бивкIурду, ккаши-мякь, дяркъу. Дяъвилия махъсса шиннугу захIматсса дия. Лащинсса тагьарданийсса экономикалул, шяраваллил хозяйствалул, промышленностьрал даража гьаз бан зун багьлай бия.
1944-ку шинал жунгу, щала шяраваллил жяматращал ЦIуссалакрал райондалийн бизан багьуна. Давурттал чIярушиврул, ссихI бигьинсса чIун дакъая, – тIий бур ПатIима. Кьура шинаву ва щар буллуну бур. Бижанал ва ПатIимал дянив мукьва оьрчI хьуну бур.
Укунсса яхI-къирият дусса, захIмат ххирасса, аькьилсса жула ниттихъал захIматсса шартIирдай ужагъругу бурувччуну, лайкьсса наслугу тарбия бувссар.
Андриана Аьбдуллаева
