Ххувшаврил кьини хъанай дур Аьрасатнал байраннавасса ца яла агьаммур байран. Буттал кIанттул цIанийсса Хъунмасса дяъвилул шиннардий фронтран кумаг бувссар дяъвилул къинттуллух зий бивкIминналгу «Гьарзат фронтран, гьарзат Ххувшаврин!» тIисса лозунгралу.
Обороналул фондирттал фронт щаллу буллай бивкIссар ярагъуннил, ккулла-янсаврал, лаххиялул ва дукиялул. Дагъусттаннал халкьунналгу тамансса кумаг бувну бивкIссар дяъвилий талай бивкIминнан. Дагъусттанлувтурал, билаятрал оьруснал ва цаймигу миллатирттал агьалинащал архIал лайкьну дуручлай бивкIссар Ватан циняв фронтирттай талай.
Дяъвилул цалчинми шиннардий Обороналул фондирттал фронтрайн тIайла бувкссар 3 бронепоезд, танкардал колоннартту, авиаэскадрильяртту, Къара-Къараевлул цIанийсса дучрал эскодрон, дакьин дуллай бивкIссар фронтрая дучIан дайсса дяъвилул техника, фронтрайн диян дуллай бивкIссар Дагъусттаннал навтлия дурсса ччуччия.
Къинттуллух зий бивкIминнал фронтрайн гьан бувссар 150 вагон дукиялул, 140 вагон гъилисса янналул, 50 азарда тонна ппалул ва цаймигу затру. Мукунна фронтрайн тIайла дуркссар халкьуннал хушрай дартIсса 1 млрд къуруш.
Дагъусттаннал чIярусса районнал фронтран буллай бивкIссар личIи-личIисса кумагру. Ккуллал райондалулгу бувссар цала чулухасса кумаг фронтран. Ваччав 1941 шинал янна щащай промартельдануву сакин бувну бивкIссар Обороналул фонд. Га фондрал штабраву зий бивкIссар Рамазанов Аьбдул – промартельданул председатель, Кьурбанов МахIаммад – промкомбинатрал председатель, Гъазиев Угълан ва Исмяилов Ислам – ппал ва луттирду хIадур байми. Промартельданул къатраву дузал бувну бия фронтрал аьралийтуран посылкартту тIайла дуккайсса къуш. Тичча фронтрайн тIайла дуккайсса дия бурттигьалтрансса кьай-кьуй, турду, ххаржанну, варсив, къуттакьяпри, чал хьхьуртти ва цаймигу затру. Яттил луттирду кIикIайсса ва рахIурду байсса къатта дузал бувну бия Хъун-Неххал чIарав.
Ттул буттал, Кьурбанов МахIаммадлул, 1935 шинал сакин дурну диркIссар коммуна – Гьарун Сяидовлул цIанийсса колхоз, га хьуссия колхозрал председательгу. 1941 шинал ахирданий МахIаммад Кьурбанов хьуссар хъун бакъасса промкомбинатрал председатель, мунил кумаг байсса бивкIссар Обороналул фонд ва райондалул агьали производствалул ва ичIаллил хъуслил дузал буван.
Ва макьала чирчума Ваччиял шяраватусса Камил МахIаммадов (1934 ш.) гьуртту хъанай ивкIссар Ккуллал райондалул фронтран кумаг баврил давурттавух. На ттущава шайсса кумаг буллай уссияв оьрмулул бугьараминнан Ватандалийн кьини дурксса чIумал.
Кумаг тIалавну бикIайва шяраваллил хозяйствалул давурттал чIумалгу. Дяъвилул шиннардий колхозирттал ва совхозирттал агьамсса кIану бугьлай бивкIссар агьали ва аьрал дукиялул щаллу бавриву. Колхозрал хIаллил лакьлакьисса чIумал на кумаг байссия нитти-буттан.
Камил МахIаммадов
ХIадур бувссар ХI.Аьдиловлул
