Буттал кIанттул цIанийсса Хъун дяъвилул ветеран, Султаннул арс Тажир Амиров увну ур 1910 шинал Ккуллал райондалий Хъусращиял шяраву.
1941 шинал райондалул аьралий комиссариатрал повестка дуркIун, Тажир увцуну ур Хъун дяъвилийн.
1944 шинал январь зурул 18-нний медико-санитарный 281-мур батальондалуву аьпалул хьуну ур 109-мур стрелковый дивизиялул 602-мур стрелковый полкрал хъунама сержант Тажир Амиров. Увччуну ур Ленинград шагьрулийсса Вологодско-Ямская слобода тIисса аьралитурал гьаврду дусса 198-мур хIатталлив.
Амирдул душ Сиясат Мударисова ялапар хъанай бур Буйнакскалив цила душничIа. Ппу дяъвилийн увцусса ппурттуву Сиясатлул нинугу аьпалул хьуну дур.
Ванин ххуйну дакIний бур райондалул кказитрай бивщуну бивкIсса, Хъун дяъвилий къучагъну талай ивкIсса буттахь барчаллагь тIисса чагъарду. Сиясат къуману бур Барчаллагьрал чагъарду ва кказитру ябан къавхьуну тIий. ВаничIа бур 2008 шиналсса «Илчи» кказитрал парча, цила буттал сурат дунутIий ябуллалисса.
Тажирдул ивкIун ур шама уссу: ПирмахIаммад, МахIа ва Аьбдуллабаг. ПирмахIаммад ва МахIа, оьрмулул хъунисса бунутIий, дяъвилийн къабувцуну бур. Аьбдуллабаг тIима дяъви байбишин хьхьичIсса шиннардийва Днепропетровскалий мединститутраву дуклай ивкIун ур. Тийхва кулпатгу бувну бур. Дяъвилийнгу тихава увцуну ур. Архивраву бур Амиров Альберт Султанович – цалчинмур ранграл аьралий хIакин тIий чивчуну. Дяъвилий цащалва архIал дуклай бивкIсса оьрчIан хьунаавкьуну, тайннангу кумаг буллай ивкIун ур. Дяъви къуртал хьуну махъ кIийла увкIун ур Хъусрахьхьун. Днепропетровскалий ванал кулпатгу бувну бур, кIия арсгу увну ур. ЦIанасса заманнай тайннал бакIрачIан бувкIмур кIул бан хъанай бакъар.
Тажир хьхьичIунну дуклакисса, гьарца чулухунай итххявхсса ивкIун ур. Ттупанг аьщуйн щун баврил гьунар фронтрайн гьаннинма бивкIун бур ванаву. Хъусращиял школалий тарихрал дарсру дихьлай ивкIсса Асадуллагь Аьллаев чичлай ур, Тажир Хъусращиял школалул директорнугу уссия, ЦIущаннив учительшивугу дуллай уссия тIий. ЦIущаннив цанма ччан хьусса душния, Къисттаманнуя, кулпатгу бувну бур.
Уттигъанну Сиясатлул душ ПатIима бувкIунни цила ттаттал гьаттайн бивну. Ванихьхьун 281-мур медсанбатрал архиврава дуллуну дур, танийра блокадалул Ленинградрая гьан дуван къархьусса, аьпалул хьуну махъ Тажирдун ЯтIул ЦIукул орден шамилчингу дуллуну диркIсса извещение.
Архиврава Тажирдул наградарттаясса информациягу кIул бувну, ттаттал гьаттай тIутIивгу дирхьуну, кьулгьу-алхIамгу бувккуну, цува лявхъусса буттал шяравасса аьрщарал кIамагу гьаттайн бивчуну, бувкIунни душнил душ ПатIима.
Михаил Акаразуев
Тажирдул ниттичIан бувкIccа чагъар
Жу, Лениннул цIасса шагьру душманная буручлачисса талаталт, командиртал ва хIаписартал, тIайла буклай буру Дагъусттаннал захIматкашнайн кIирисса cсалам!
Гьалмахтал! Жул взводраву къуллугъ буллай ур зул ватанлув, Ккуллал райондалийсса Хъусращиял шяравасса Тажир Амиров. Жун ччай бур зухь бусан ванал аьралий давурттая.
ЧIивима сержант Тажир Амиров ур ххаллилсса снайпер ва разведчик. Нигь, ццах цирив къакIулну, ва уклай ур душманнал обороналул дазуйн, цанма къулайсса куццуй душманнайн авлий уклай ур.
Ванал бивтун бивчуминнал сияхIрай ур 42 фашист. Ччя-ччяни Тажир цала кьюкьлущал уккай душманнал къинттуллухун ва тиха зана шай «мазращал» ягу лавсун учIай душманнаясса хъинну аьркинсса информация.
Аьралий буржру биттур буллалаврихлу гьалмахчу Амиров кIийла лайкь хьуссар ЯтIул ЦIукул ордендалун.
ДакIнийхтуну барчаллагь тIий буру къучагъсса снайпернал ниттихь ПатIимат Амировахь, ватандалун лайкьсса арс тарбия аврихлу.
Капитан Алексеев, хъунама лейтенант Аьбдуллаев, чIивима лейтенант Саркали.
Талаталт: Иванов, Фармазанов ва цаймигу.
Полевая почта 09403.
(«Дагестанская правда» 04.10.1943 ш. № 214).
