Апрель зурул 2-нния 4-ннийн бияннинсса гьантрай Аьрасатнал Жяматийсса палаталуву, Федерациялул Советраву, мукунма Москавуллал кIулшивуртту дулаврил идарарттай хьунни «Консорциум по развитию школьного инженерно-технологического образования» тIисса КIулшивуртту дулаврил организациярттал каялувчитурал ассоциациялул гьарта-гьарзасса заседание.
Ва сакин дурну дия «Консорциум по развитию школьного инженерно-технологического образования» тIисса КIулшивуртту дулаврил организациярттал ассоциациялул, Аьрасатнал Жяматийсса палаталул кIулшивуртту ва тарбия дулаврил комиссиялул ва «Просвещение» издательствалул. Заседаниялул мероприятиярттай гьуртту хьунни хьхьичIунсса инженерный школардал каялувчитал, техникалул колледжирттал директортал, вузирдал ва промышленный предприятиярттал зузалт, мукунма Аьрасатнал личIи-личIисса регионнайсса Департаментирттал ва КIулшивуртту дулаврил управлениярттал вакилтал.
Заседаниялул лагма лаган бувну бия Аьрасатнал 26 региондалиясса вакилтал. Дагъусттанная бия Халкьуннал Мажлисрал КIулшивуртту дулаврил ва элмулул комитетрал председатель Е.И.Павлюченко, Хасавюртуллал райондалул КIулшивуртту дулаврил управлениялул хъунама К.К. Кабардиев, Дагъусттаннал Учительтурал ассоциациялул каялувчи А.Б.Байрамбекова, Гьунар бусса оьрчIансса чIяру профиллу дусса Республикалул лицей-интернатрал директор А.В. Шутунова. Шикку ххал бивгьунни школардай инженерный кIулшивуртту дулаву лядуккан даврил масъалартту.
Аьрасатнал Жяматийсса палаталул кIулшивуртту ва тарбия дулаврил комиссиялул председатель Наталья Кравченкол кIицI лавгунни билаятрал экономика ва промышленность хьхьичIуннай даврил ххуллий цуксса агьамсса кIану бугьлагьиссарив техникалул вузирдаву ва инженерный школардай инженертурал кIулшивуртту ласаврил.
Заседаниялул лагрулий, 2024-2025-ку дуккаврил шинал хIасиллайн бувну, Ассоциациялул чялишсса гьурттучитуран дуллунни наградартту. Жяматийсса палаталул кIулшивуртту ва тарбия дулаврил комиссиялул председатель Н.В.Кравченкол чулуха Барчаллагьрал чагъар буллунни жула лаккудуш Альбина Шутуновангу.
ДакIнин бутан, Альбина зий буссар лицей-интернатрай 2012-ку шиная шихунмай. Байбихьулий ва буссия учительну ва тарихрал кафедралул хъунмурну. 2019-ку шинал тапшур бувну бур завучнал къуллугъ. 2021-ку шиная шихунмай лицейрал директорну бур. Альбина хъанай бур Дагъусттаннал Тарихрал ва обществознаниялул учительтурал ассоциациялул каялувчигу. Ва бур Дагъусттаннал КIулшиву дулаврил лайкь хьусса зузала. Пишалул ххуллий уттинингу ванил цикссагу грамотартту ва Барчаллагьрал чагъарду лайкь бувну бур. Ирглийсса наградалущал барчагу буллай, чIа тIий буру гьарица дуллалимуниву хьхьичIуннайшивуртту ва тIайлабацIуртту.
Андриана Аьбдуллаева
