Вай гьантрай «Дагестанская правда» кказитрал редакциялий хьунни Украиннал аьрщарай нанисса хасъсса аьралий операциялий гьуртту хъанахъисса дагъусттанлувтуран ва Аьрасатнал Вирттавран хас бувсса «Ангелы Победы СВО: Дагестанцы – Герои России» тIисса луттирал презентация. Лу итабавкьуну бур «Дагестан» тIисса республикалул издательствалул «Дагестанская правда» кказитрал редакциялущал цачIуну, Ххувшаврил 80 шинал юбилейран хасну.
Ва хъанай бур аьралий операциялул иширттаву къучагъшиврий жанну дуллусса вирттаврал чувшивурттая бусласисса, кIилчин итабакьлакьисса лу. Ванил автор бур «Дагестанская правда» кказитрал корреспондент Надежда Тузова.
Шикку гьуртту хьунни Аьрасатнал Виричу МахIаммад Исбакиевлул нину Марина Исбакиева, Аьрасатнал Виричу Фархад Худайнатовлул кулпат Галина Худайнатова, Къучагъшиврул кIира ордендалул кавалер Нияз Меликовлул нину Халида Меликова, хъунама прапорщик Казбек Ибрагьимовлул кулпат Аьйшат Ибрагьимова, Къучагъшиврул ордендалул кавалер, сержант Арслан Ибрагьимовлул нину Сафинат Ибрагьимова.
Презентациялул мажлис тIитIлатIисса ихтилат бунни «Дагестанская правда» кказитрал хъунмур редактор Бурлият Токболатовал.
– ХIакьину жул коллективран хъуннасса агьамшиву дусса кьини хъанай дур. Жу итабакьарду «Дагестанская правда» тIисса библиотекалул проектрал лагрулийсса ирглийсса лу.
Ларгсса шинал пикри хьуна хасъсса аьралий операциялул Вирттавран хас бувсса лу итабакьинсса. Луттираха зий байбивхьусса ппурттуву СВО-лий аьралий бигарду бартбигьлай 9 дагъусттанлув лайкь хьуна «Аьрасатнал Виричу» тIисса бусравсса цIанин. Муния шихунмайгу Вирттаврал сияхI 13-ннийн лархъун дур. Мунийн бувну, хIукму бувссия, шивун къабувхсса Вирттавраягу чивчуну, ца уттигу лу итабакьинсса. Ва ишираву жун хъунмасса кумаг бунни «Дагестан» издательствалул директор ОьмархIусман ХIажиевлул.
Хъинну захIматну бур вай Вирттаврая гъалгъа тIун. Ттул чIарав щябивкIун бур язисса арсурваврацIа, ласваврацIа хьусса ниттихъул, кулпатру. БувчIлай бур вайннангу бигьану бакъашиву. ЩинчIавгу бигьану бакъар, Ватандалул мурадру буручлай жанну дуллай бур цикссагу къучагътал. Жува буржлувссару вайннал аьпа абад буллан, – увкунни Токболатовал.
ОьмархIусман ХIажиевлул кIицI лавгунни, Вирттаврал маччаминнащалсса хьунабакьаву мудангу асар хьунсса шайшиву.
– Ва луттираха зий бивкIсса журналистътурал ва басмаханалул зузалтрал мурад, Ватан дуручлай, къучагъну талай бивкIсса дагъусттанлувтурая ялун нанисса никирахь бусаву хъанахъиссар. Ттул пикрилий, укунсса луттирду бикIан аьркинссар цинявппагу школардайсса библиотекарттаву, патриот клубирттаву. ХIакьинусса кьини жула жагьилтуран аьралий бигарду бартбигьлан багьлагьисса захIматсса чIунну дуркIун дур. Жагьилтуран кIулну бикIан ва эбратну хьун аьркинссар жула вирттал, – увкунни ванал.
Надежда Тузовал кIицI лавгунни, дунияллийн цIусса лу буккаву мудангу хъуннасса агьамшиву дусса иш хъанахъишиву.
– Буслайнма буру жува, билаятрал цашиву ва тархъаншиву дуручлай, Ватандалул ххуллий чувшиврий жанну дуллусса вирттаврая. Умуд бур ва лу жагьилсса никирал дянив тIалавну бикIанссар тIисса, – увкунни ванил.
«Ангелы Победы СВО: Дагестанцы – Герои России» тIисса лу бувккуну махъ, Вирттаврал ниттихъащал хьунаакьинсса пикрилий, презентациялий гьуртту хьун увкIун ия МахIачкъала шагьрулул 39-мур лицейрал 6-мур классрал дуклаки оьрчI Тамерлан Бабаев.
– Барчаллагь зун къучагъсса арсру тарбия баврихлу. Зу тарбия бувсса жагьилтурал исват бунни иш багьсса чIумал Ватан дуруччин хIадурну бушиву. Аьрасатнал президент Владимир Путиннул кIицI лавгсса куццуй, хасъсса аьралий операциялий гьуртту хъанахъисса гьарицагу аьралийчу Виричунан ккаллиссар, – увкунни Тамерланнул.
Марина Исбакиевал барчаллагь увкунни хасъсса аьралий операциялий къучагъшиврий жанну дуллусса аьралийтурал аьпа буруччаву мурадрай итабавкьусса ххаллилсса луттирахлу.
– Ттул арс ия ххишала акъа дакI-аьмал хъинсса инсан. Лагма-ялттуминнан кумаг бан чялиш увккун икIайва. Ва ия унгу-унгусса патриот. Халкьуннангу, билаятрангу хайр-мюнпат хьунсса давурттив дуллансса хияллай икIайва. На ттула бусса оьрму арснаща дан къабювхъусса давурттив дузрайн дуккан даврин хас буллай бура. Ттула арсру кунмасса оьрчIан гуманитар кумагру батIлай, аьралийтурал кулпатирттан кумагру буллай, шаймур буллай бура, – увкунни Марина Исбакиевал.
Презентациялий ихтилатру бунни ДР-лул Печатьрал ва информациялул агентствалул каялувчинал хъиривчу Аслудин МахIаммадовлул, «Дагестан» этномедиахолдинграл хъунама Жамалуттин Аьбдуразакьовлул, «Дагестан» РГВК-лул директор Камила ХIамзатовал, «Дагестанская правда» кказитрал журналист Сабина Исрапиловал.
Луттирал дайдихьу дурну дур бусалдаравун агьсса Аьрасатнал Виричу НурмахIаммад ХIажимахIаммадовлуя. Гихунмай бур «Дагестанская правда» кказитрай рирщуну диркIсса, Украиннавусса хасъсса аьралий операциялул гьурттучитураясса яргсса макьалартту дусса бутIа.
Имара Саидова
