ТIагьировлул бувсунни Лак­рал Кубок тIитIаврийн бувкIсса бусравсса хъамаллурал цIарду: Дагъусттаннал спортрал министр Сажид Сажидов, ДР-лул Халкьуннал Мажлисрал кIанттул цилакаялувшиврул ва регламентрал комитетрал председатель Артур Исрапилов, ДР-лул Халкьуннал Мажлисрал председательнал хъиривчу Камил Давдиев, ДР-лул Халкьуннал Мажлисрал Бюджетрал политикалул комитетрал председатель Марат Илиясов, Лакрал райондалул бакIчи Юсуп МахIаммадов, ДР-лул Халкьуннал Мажлисрал Спортрал ва жагьилтурал иширттал комитетрал председатель Мурат Пайзуллаев, ДР-лул Спортрал министерствалул управлениялул хъунама Марат Ибрагьимов, ДР-лул Жяматийсса палаталул председательнал цалчинма хъиривчу Ссапарбаг Аьбдуллаев, Аьрасатнал Виричу НурмахIаммад ХIажимахIаммадовлул ниттиуссу Малик Мазаев ва уссу Аьбдулла Абачараев, кикбоксинграл спортрал мастер Амирхан Амирханов, лачIун буккаврил Европанал цIуну хьусса чемпион Ибрагьим Ибрагьимов.
Яла махъру лавхъунни цIарду кIицI дурсса сайки цинявннал.

Камил Давдиев: «Барча тIий ура Лакрал Кубокран 10 шин шаврил шадлугъ! Укунсса мероприятиярттал цачIун буллалиссар, гъан буллалиссар лакрал районнал шяраваллал ва цаймигу районнайсса лакрал жяматру. Му куццуй цIакь хъанахъиссар Дагъусттаннал халкьуннал дянивсса дусшиву. Сиражуттин МахIаммадовичлун лакрал цинярда районну хьхьичIуннай хъанай, тIутIайх дичлай, цачIун хъанай ччай бия. Му зат дакIнийну сакин дурну диркIссар ганал ва турнир. На барчаллагь тIий ура ва турнирданий гьуртту хъанахъисса командарттахь, цинярдагу дур 38. Ххув хьувча яла лайкьмур команда!» – увкунни Камил Давдиевлул.
Артур Исрапилов: «Ттун дакIний дур цалчинми турнирду.Таний жул пикри бикIайва, хьунавав жущара вай турнирду ядан, аьдатравун дагьан дуван, ялун нанисса никиралгу дулланшиврул, тIисса. Вана утти турнир яхьуну 10 шинал мутталий. Вай шиннардий тамансса цIусса оьрчIру гьуртту хьунни турнирданий.
Спорт дур оьрмулул куц (образ), оьрмулул философия. Футболданул, спортрал мяъна дакъассагу, дуссар тарбия баврил мяънагу. Спортраву сакин шайссар ва кьянкьа шайссар адаминал хасият. Ттул мурад бур Лакрал Кубокрая Дагъусттаннал Кубок шаву.

Барчаллагь цинявннан, чIа тIий ура цIуллушиву ва хъиншивуртту!» – увкунни Артур Исрапиловлул.
Юсуп МахIаммадов: «Сиражуттин МахIаммадовичлул жухь тавакъю бувна, турнирданун кумаг буван, га бачIиххуллий дацIан къадитан. Ганал хиял бия турнирданувух, циняв лакрал районну дакъасса, лакрал шяраваллу дусса цаймигу районну ва шяраваллу гьуртту шаву, цачIун шаву. Мукун хьунни иширайнугу: Лакрал, Ккуллал ва ЦIуссалакрал районнал шяраваллащалсса ва жагьилтуращалсса дусшиву цIакь хъанай дур Дахадаевуллал, ЧIарадиял, Рутуллал, Ахъушиял районнайсса лакрал шяраваллал ва жагьилтурал.
Сиражуттин МахIамма­довичлул цIанийсса турнир ганал арсварал дацIан къадитлай бур. Жугу миннал чIарав бавцIуну буру.
ЛачIун буккаврил Европанал цIуну хьусса чемпионнан, жула Ибрагьим Ибрагьимовлун чIа тIий ура цIуллушиву ва Дунияллул чемпионатрайгу ххув шаву», – увкунни ихтилатчинал.
Ссапарбаг Аьбдуллаев: «На гьарца тIуркIулий тамаша буван учIара. Спортрал дусшиву цIакь дуллалиссар, мунил жува цачIун буллалиссару. Спорт – му цIуллушивур. Турнирданий гьуртту хъанахъиминнан чIа тIий ура хьхьичIуннайшивуртту ва тIайлабацIуртту.
Лакрал Кубок тIитIаврий махъру лавхъунни цайминналгу.
Илиясовхъал кулпатрал чулуха бавтIми барча буллалисса ва миннахь барчаллагь тIисса махъ лавхъунни Марис Илиясовлул.
«Ппу даим учIайва Лакрал Ку­бокрал турнир тIитIаврийнгу, га лакьайсса чIумалгу. Тама­шалийн учIан къахьурча, цIу­ххайва турнирданул иширттал хIакъираву.
ХIакьину жува цIунилгу бав­тIун буру Лакрал Кубок тIит­Iаврийн, чIявусса инсантал бувкIун бур ва ххуллухьгу. Жу барчаллагь тIий буру турнир сакин дурминнахьгу, ваний гьуртту хъанахъиминнахьгу. Жул бу­ттал мурад бия Лакрал Кубокрал турнир гьарца шинах укун лавайсса даражалий тIайла дуккаву. Барчаллагь, цIуллу баннав!» – увкунни Марис Илиясовлул.
Ванал Ибрагьим Ибрагьимовлухь барча увкунни Европанал чемпионатрай ларсъсса ххувшаву ва бувсунни ванан хъинсса бахшиш хIадур дуллай бушиву.
Яла Лакрал Кубокрал сакиншиндарал комитетрал член Руслан ЖахIпаровул кIицI дунни турнирданий гьуртту хъана­хъисса командарттал вакилтурал цIарду.
Гара кьини суперкубокрал цIаний хьунадаркьунни 2024-мур шинал Лакрал Кубок­рай ххув хьусса Хъусращиял команда ва Лакрал Лигалул чемпион Хъурхърал команда. Миннул тIуркIулул счет хьунни 1-1. Пенальтилий 3-2 счетрай ххув хьунни Хъусращиял команда ва мунил лавсунни суперкубок.
Гара кьини ччалли дурксса Лакрал Кубокрал командарттал счетру укунсса хьунни:
Уручул – Хьур 0-1
ЧIяйми – Хъюйми 0-0
Къян 2 – Бурши 5-2
Дюкъул – Бархъал 5-0
ЦIуссалак – Читтур 1-3
Уручул – Шушими 6-2
ДучIими – Ккул 2-3
Кьуби – ЦIийши 3-1
Ххюлуссун – ЧIурттащи 8-0
Ваччи – Кьукун 2-2