Апрельданул 12-нний щалагу билаятрай кIицI лагайссар Космонавтикалул кьини. Байрандалул кьинилун хасну Ккуллал райондалул Культуралул ва досуграл центрданий хьунни «Первый полет в космос» тIисса цIанилусса викторина.
Шикку гьуртту хьунни Ваччиял дянивмур даражалул школалул дуклаки оьрчIру, учительтал ва культуралул центрданул зузалт.
Викторина дайдишин хьхьичI ва кьинилул тарихрая бувсунни райондалул Культуралул ва досуграл центрданул хъунмур Асият МахIаммадовал.
Цалчин аьламравун левхсса Юрий Гагариннул оьрмулул ва захIматрал ххуллия бувсунни Ваччиял школалул учитель Саманият ЯхIияевал.
Жула лаккучу Муса Маннаров «Союз ТМ-4» аьламрал жамилий 1987 шинал декабрьданул 21-нний космосравун левхсса чIумуя балжину бувсунни Ирина Загьидиновал.
Шавлухъ СалихIовал кIицI лавгунни Муса Маннаров аьламравун левхсса чIумал Дагъусттаннал агьали дазу-зума дакъа ххарину ва пахрулий бивкIшиву.
Хъирив дунни аьламрал тарихраясса кIулшивуртту аьч дуллалисса викторина. Бахшишру дуллай, ххари бунни тIайласса жавабру дуллусса оьрчIру.
Имара Саидова
