Хасъсса аьралий операция байбивхьуния шихунмай жула инсантурал аьралуннан буллалисса кумаграл хIат-хIисав да­къар. ХIакьину республикалий аьрайнсса маскировочный къер­тту щашлашисса, хъамул чирахъру ва цаймигу кумагру буллалисса цикссагу штабру тIивтIуну бур.

АлхIаткьини «Илчи» кказитрал зузалт гьуртту хьунни Расул ХIамзатовлул цIанийсса Миллатрал библиотекалуву маскировочный къертту щашлашисса акциялий. Шикку аьралийтурал мюхчаншиву дуруччавриву ишла дайсса къертту щашлай бур Зайнаб Рашидовал каялувшиндаралусса «Диалог» тIисса центрданул волонтертал. Вайнная бавну, шагьрурдая, районная, личIи-личIисса идарарттая нех дирхьуну букIлай бур центрданийн. Къертту щащай штаб тIивтIуния шихунмай аьралийтуран гьан дурну дур сайки 1500 маскировочный къери, даруртту, виргъанну, кIараллу, янна, дуки-хIачIия къахIисавну.

Зайнаб цимилгу лавгун бур аьра­лийтуран цила штабрай щарщусса къертту, янна, дуки-хIачIия хIаласса ссайгъатру биян бан.
Центрданул даврин кабакьу буллай, хъунмур харж бихьлай ур Аьрасатнал Федерациялул ПаччахIлугърал Думалул депутат Жамалуттин ХIасанов. Мукунма вайннал чIарав бацIлай бур ДР-лул БакIчинал бувгьусса ххуллу хъин чулий ккаклакисса жяматийсса идаралул ва «Народный фронт «За Россию» суккушиндарал Дагъусттаннайсса отделениялул вакилтал.
Аьралийтуран кумаг буллалими чIяву хъанан бивкIукун, тIивтIуну бур республикалул шагьрурдайгу, районнайгу къертту щашлансса шартIру дусса тамансса пунктру. Зайнаб Рашидовал хIарачатрайн бувну, маскировочный къертту щашлай буссар МахIачкъалалив, Каспийскалив, Лаващиял, Буйнакскаллал, Дахадаевскаллал, ЦIунтIиял, Лакрал ва цаймигу районнал щархъай.
Волонтертурал буллалисса захIмат бувчIинтIиссар ца кьини­сса бунугу вайннащал зун бувкIсса инсантуран. Къертту щашлансса янна дузал даву, щащан лахьхьин баву ва ми аьралийтурачIан диян даву бигьасса даву дакъар. Яла-яла, шикку аьркинну бур зунсса инсантал.

Вайннал дуллалимуницIун кабакьу буллалисса, чIарав бацIлацIисса, дакI цIуцIисса чансса бакъар. Шикку къертту щашлай бур ГьунчIукьатIрал шяравасса Саида Къушиева. Ванил бувсунни аьралийтуран посылка гьан дан бувкIсса ппурттуву, къертту щашлашисса душру-хъами ххал хьуну махъ, вайннащал зунсса гъира-шавкь дагьшиву.
Республикалул травматологиялул центрданий санитаркану зузисса, Бархъаллал шяравасса ХIалимат ХIаммадова бия отпускгу лавсун, къертту щашлан бувкIун. ХIалиматлул отпускрай цинма буллусса харжигу къертту щащаврин аьркин дансса материал ласун буллуну бия.
– Ттула даврия тархъансса ца барз бунугу, шаппа телевизорданух сериаллу ккаклай щябикIаяр, жула аьралитуран, хъис-бунугу, хайр буну гьан бансса пикри хьуну бувкIра, – тIий, буслай бур ХIалимат.

Ванил цищалва къертту щашлан бувцуну бия ласнал ссурахъу Хамис Кьурбановагу.
Жула оьрчIру мюхчан баву мурадрайсса давурттавух хIала буххан Центрданийн букIлакIисса инсантал бур жагьилссагу, бугьарассагу. ХIасил, вай цинявппагу бур чумартшиву ва яхI-къирият ялтту дурксса, уздансса инсантал.

Зайнаб буслай бур цуппа ва давриха зий байбивхьусса куц:
– Минводылийн волонтертурал форумрайн лавгсса ппурттуву, ттун хьунабавкьунни маскировочный къертту щашлаши­сса, аьралийтуран кумаг бавриха зузисса инсантал. Миннал, нагу цала ккурандалувун кьамул бувну, лахьхьин дунни къертту щашлансса ва му даву жула республикалийгу дайдишинсса куц. Гьай-гьай, байбихьулий ттун хъинну захIматну бия. Бакъая вай давуртту дуллансса, волонтертал зузи бансса кIану. Жу цалчинсса къертту щашлай байбивхьуссару МахIачкъалалив Редукторный поселокрайсса теплосетьрал диспетчерский пункт бивхьусса, аьла­гъужа бусса къатраву. Мукун­сса шартIирдай зий волонтертал бухлай бия. Амма жун цукунсса-бунугу зун­сса кIану бирияврийнгу щукру бан багьлай бия. Гихуннай жул даву щириркIуна, ка-кумаг бан, чIарав бацIан ччисса инсантал гьарза хъанай байбивхьуна. ХIакьину центрданийн къертту щащан бучIайсса волонтертурал аьдад 400-нния лирчусса дур, – буслай бур Зайнаб.
Ванил цIуну байбихьлахьиминнан буллай бур къертту щащаврил мастер-классру. Вай ккаккан бувссар ванил Луганскаллал областьрайсса 25-мур школалул дуклаки оьрчIангу.
Мастер-классругу ккаккан бувну, къертту щашлансса хахру ва материаллу дуллуну дур Лакрал райондалийсса Гъумучиял ва ГьунчIукьатIрал школардан. Утти шиккугу щашлай бу­ссар къертту.
– Бронежилетру ва каскарду кунна аьркин дагьлай дур къерттугу. Барчаллагь зун, жул оьрмурду буруччаву мурадрай бихьлахьи­сса захIматрахлу, – тIий чичлайнма бур СВО-лийсса аьралийтал центрданул волонтертурачIан.

Ва кьини «Илчи» кказитрал зузалтрал щарщусса къертту, дуаьрдугу дурну, тIайла дурккунни аьралийтурачIан.
– ХIакьину, шикку къертту щашлашисса ппурттуву, ттун дакIнин багьунни «Цимурца фронтран, ххувшаву ласаврил цIаний» тIисса тарап дургьуну дяъвилун кумаг буллай бивкIсса жула буттахъул.
– Я Аллагь, волонтертуралгу, вайннал чIарав бацIлацIи­минналгу буллали­сса кумаг цадакьану бацIаннав. Циняв жула жагьилтал цIуллу-сагъну занахьуннав, дяъвилул цIу ччяни лещаннав, – увкунни «Илчи» кказитрал хъунама редактор Руслан Къардашовлул.

Имара Саидова