Апрель зурул 9-нний Р.ХIамзатовлул цIанийсса Миллатрал библиотекалуву хьунни хасъсса аьралий операциялул гьурттучитуран хас дурсса «Память о вас вечно жива» тIисса мероприятие.

Шикку гьуртту хьунни властьрал органнал, районнал администрациярттал, жяматий­сса организациярттал вакилтал, жяматийсса ишккаккулт, хасъсса аьралий операциялул гьурттучитурал гъан-маччами.
Миннавух бия Дагъусттаннал Халкьуннал Мажлисрал председательнал хъиривчу, «Справедливая Россия» партиялул региондалул отделениялул советрал председатель Камил Давдиев, Дагъусттаннал Жяматийсса палаталул председательнал хъиривчу Ссапарбаг Аьбдуллаев, жяматийсса ишккаккулт Шалласу Шалласуев ва Аьбдулмажид МахIрамов, Дагъусттаннал Хъаннил союзрал председатель Интизар Мамутаева, философиялул элмурдал доктор, профессор Асият Буттаева, «Сила матерей» ккурандалул хъунмур Сефижат МахIаммадрасулова, авгъан дяъвилул ветеран Аьлил ХIамзаев.
Мероприятиялул сиптачи ва сакиншинначи хьунни Миллатрал библиотекалул хъунаманал хъиривмур, Дагъусттаннал культуралул лайкь хьусса зузала ­Сарат Жабраилова. Ва мероприятие лажин кIялану дузрайн дуккан дан ванил чIарав бавцIуну, хъуннасса хъар лархъунни хасъсса аьралий операциялий жанну дуллусса къучагътурал Кьурбан Кьурбановлул ва Симран Ванатиевлул ниттихъал ХIабибат Иллаевнал ва Гульнара Саидовнал, ХIабибатлул душнил, ЦIуссаккуллал школалул учитель Кабират Оьмаевал.
Бачин бувну бия мажлис «Дагестан» ГТРК-лул лакрал редакциялул хъунмур редактор, Дагъусттаннал культуралул лайкь хьусса зузала Тамара Закарьяева.
Библиотекалул залдануву дацIан дурну дия хасъсса аьралий операциялий Аьрасатнал Вирттаврал цIарду лайкь дурсса 13-гу дагъусттанчунал суратру. Фойелуву лархъун дия тийх жанну дуллусса 101 (Вирттал къахIисавну) лаккучунал суратру. КIицI лаган, «Славные сыны Дагестана» проектрал лагрулийсса «Память о вас вечно жива» мероприятие дуллали­ссар миллатирттал секциярдайх дарчIуну. Ва кьинисса мажлис бия лакрал къучагътуран хас бувсса.
Мероприятие дайдирхьунни МухIсин Камаловлул щаллу бувсса «Кьурукьру» балайлия. Хъирив ихтилат бунни ­Сарат Жабраиловал. Ванил бувсунни «Славные сыны Дагестана» проектрал лагрулий дуллалисса ва мероприятиялул ялув кIива зурул мутталий зий бивкIшиву, ва давриву цала чIарав ххуйну бавцIушиву хасъсса аьралий операциялий жанну дуллуминнал нинухъру, щахъами, гъан-маччами. Бувсунни «Славные сыны Дагестана» проект 2023-ку шиная шиннай зий душиву ва мунил лагрулий хасъсса аьралий операциялул гьурттучитуран хас дурсса чIярусса ххаллилсса мероприятияртту дуршиву.
Билаятрал мурадру буручлай, жандалия ка ларсун талатисса жула аьралийтурал къучагъшиву кIицI лаглагисса, миннал нитти-буттахь ххаллилсса арсру тарбия баврихлу барчаллагь тIисса ихтилатру бунни Камил Давдиевлул, Шамил Рамазановлул. Цила ихтилатраву Асият Буттаевал барчаллагьрай кIицI лавгунни мудан аьралийтуран гуманитар кумаг гьан буллалисса Хуршиловлул кIичIиравусса штаб, барчаллагь увкунни микку зузисса лаккухъаннихь.
Шалласу Шалласуевлул був­ккунни Аьрасатнал Вир­ттал НурмахIаммад ХIа­жима­хIаммадовлун ва Фархад Худайнатовлун хас бувну цала чивчусса шеърирду. Дагъусттаннал халкьуннал артистка Луиза Шахдиловал увкунни Чувшиврул ордендалул заллу Алик Гъазиевлуха Миясат Муслимовал чивчусса мукъурттий­сса балай. МахIачкъалаллал 16-мур школалул учительница ПатIимат Аьлие­вал дурккунни хасъсса аьра­лий операциялий жанну дуллусса къучагътурал ниттихъан хас дурсса Ххадижат ЦIаххаевал назму.
Цинярда ниттихъан хасну М-З. Аминовлул мукъурттийсса ниттихасса балай увкунни Загьидат Муслимовал.
Ххаллилсса балайрду щаллу бунни Зульфият Даллаевал, Аьбдул Мурадовлул ва Рукь­ижат ХIамзатовал.
Сефижат МахIаммадра­су­ловал, ккурандалул давурттаягу бувсун, вирттаврал ниттихъан ва мероприятиялул сакиншинначитуран бахшишру дунни. Бю­ххансса ихтилат бунни «Они сражались за Родину» луттирал автор, филологиялул элмурдал кандидат ПатIимат Пайзуллаевал. МахIачкъалаллал 17-мур школалул лакку мазрал учительница АхIмадханова Загьидатлул цинярдагу ниттихъал цIания дакIнийхтунусса барчаллагь баян бунни хасъсса аьра­лий операциялий жанну дуллу­сса жула оьрчIру лякъин, миннал жаназартту ватандалийн тIайла дуккан хъунмасса кумаг буллалисса, отпускрайн наними хьунабакьлай, аьркин багьний жула аьралийтурал чIарав ацIлацIисса, Ростов-на-Дону шагьрулий ялапар хъанахъисса жула лаккучу Нариман Ванатиевлуйн. «Сила матерей» ккурандалул чулуха Нариманнунсса Барчаллагьрал чагъар буллунни ванал ссийхьхьун Калимат Кьурбановнахьхьун.
Асар хьунсса композицияртту ккаккан дунни ЦIуссаккуллал (Новострой) «Непоседа» тIисса оьрчIал багърал ва Къарабудахкантуллал райондалийсса Зеленоморскаллал СОШ-рал дуклаки оьрчIал. Дюххансса назмурду дурккунни хасъсса аьралий операциялий жан дуллу­сса ­Вагьаб Багьауттиновлул ­душнил, ­35-мур гимназиялий дуклакисса Мисайл, АхIмад-Хан Султа­ннул цIанийсса ЦIуссаккуллал школалул дуклаки душ Сафия ЦIаххаевал.

Мероприятиялул лагрулий ниттихъал лабизаву дунни Камил Давдиевлуйн, жула къучагътуран «Аьпалул багъ» тIитIин кабакьу бува тIий.
ХIабибат Кьурбановал тавакъю бунни циняв ниттихъал цIания хъунмасса барчаллагь баян бан шикку гьуртту хьун увкIсса Шамил Рамазановлуйн, Камил Давдиевлуйн, ваймигу гьурттучитурайн, ниттихъал дакIру дан бувкIсса Ккуллал райондалул Культуралул управлениялул зузалтрайн.
Аьралитурал аьпалунсса мажлис лавайсса даражалий лавгуни.

Андриана Аьбдуллаева