Майрал 25-27-нний «Минводы ЭКСПО» МВЦ-лий хьунтIиссар инвестициярттал хъунмасса форум КИФ-2025. Миккун бучIантIий бур паччахIлугърал ва корпоратив бутIрал (сектордал) бакIчитал, экспертътал ва СМИ-рдал вакилтал.

Форум сакин буллай бур «Росконгрессрал» фондрал, муницIун кабакьу буллай бур АьФ-лул ХIукуматрал ва Аьрасатнал Экономикалул лябуккулул министерствалул.
КИФ-рал сакиншиндарал комитетрал каялувчину ур АьФ-лул ХIукуматрал председательнал хъиривчу Александр Новак. Форумрал зузиссаксса шиннардий чIалачIи бунни цуппа бушиву хьхьичIунсса иширттал (деловой), экспертрал ва выставкарттал идара, цищава бюхъайсса бушиву мюнпатну лядуккан дуван властьрал, бизнесрал ва экспертътурал сообществалул дянивсса арарду. 2024 шинал КИФ-2024 форумрай хьуссар 65 мероприятие, миннувух гьуртту хьуссар сайки 430 спикер ва 4 азара делегат, миннавух – федерал ва регионнал властьрал органнал вакилтал, бизнесчитал, экспертътал ва 33 билаятраясса журналистътал. Мунил чIалачIи дурссар форумрал лавайсса даражалул агьамшиву ва СКФО-рал инвестициярттал каширду. КИФ-2024 форумрал хIасиллайну къулбасру дурну диркIссар 106,1 млрд къурушрансса 100 рязишиврул кьутIилий.

Форумрай личIисса къулагъас дуллантIий бур лахъисса мутталийсса уртакьшивуртту (долгосрочные партнерства) ва бизнес-дахIавуртту дузал даврих. КИФ-рал инвестортуран хьун буллалиссар цIу-цIусса бюхъурду, кумаг буллалиссар лякъин цIусса даврил уртакьтал ва лядуккан дуллан регионнан аьркинсса инвестициярттал проектру.

ХIасан Аьдилов