Апрельданул 7-13-нний Словакиянал хъуншагьру Братиславалий най дур лачIунбуккаврил Европанал чемпионат.

Ва зурул 8-нний Аьрасатнал лачIунбуккултрал дурххунни 4 мусил медаль. Вай ларсминнавасса 2 ур Дагъусттаннал лачIунбуккаврил школалий вардиш хъанахъисса: МахIачкъалалиясса Ибрагьим Ибрагьимов (65 кило) ва Хасавюртлиясса АхIмад Усманов.
Ибрагьим вай бяст-ччаллаву лачIун увккун ур ххюйла. Финалданий ва ххув хьуну ур Франциянал командалухлу уклай ивкIсса ХIамзат Арсамерзуевлуяр. Лаккучу ванаяр ххув хьуну ивкIссар дукIумур Европанал чемпионатрайгу. Гикку мусил медаль ласаву лаккучунал яла хъунмур награда ва хьхьичIуннайшиву хъанахъиссар дунияллул халкьуннал дянивсса бяст-ччаллаву.
Умуд бишинну Ибрагьимлул ттинияр тихуннайгу ласаваншиврий мусил медаллу.
Барча, Ибрагьим, вил Европанал даражалийсса ххувшаву!