Апрельданул 4-нний Дагъусттаннал ХIукуматрал председатель Аьбдулмуслим Аьбдулмуслимов къуллугърал аьрххилий увкIунни Сулайман Стальскаллал райондалийн.
Тикку ва ивунни цIуну бувсса ООО «Полоса» цIанилусса ахъулсса ядай кIанайн (плодохранилище).
ООО «Полоса» инвестпроект хъанахъиссар «Закладка интенсивных и фундучных садов, строительство плодохранилища» тIисса проектрал подпроект. Ва бартдигьаврил ялув ацIаву дуллай ур ДР-лул бакIчи Сергей Меликов.
Компаниялул буллай бур региондалий яла хъунмурну ва Ухссавнил Ккавкказнаву яла хъунминнувасса цану хъанахъисса, 50 азарда тонна ахъулссаннул ядайсса кIану. Проект бартдигьлай бур цаппара ятIапирттай. Цалчинмур ятIапрай, 12,5 азарда тонна ахъулссаннул ядай кIану бувну, зун бивкIссар 2024-ку шинал. КIилчинмур ятIапрай мукунсса кIану бувну къуртал хьунтIий бур 2026-ку шинал. Инвестициярттал аьмсса лагру хьунтIий дур 5,2 млрд къуруш.
Ахъулсса ядайсса, сортировка дайсса, шюшайсса, упаковка дайсса, транспортрай духхайсса хьхьичIунсса технологиярттайну бюхълай бур ттучаннайн мудан дучIан дуллан ахъулсса.
Аьбдулмуслим Аьбдулмуслимовлухь миннуя бувсунни «Полоса» ООО-лул гендиректор Арсен Айбатовлул. Ванал тIимунийну, ахъулсса ядай кIанттай зий дусса дур гьава низамрайн буцаврил газрал система, мунийну бюхълай бур къатраву температуралул ва хъатрулул ялув бацIан, ми аьркинсса даражалий дитан.
Аьбдулмуслим Аьбдулмуслимовлул барчаллагь кунни ДР-лул Халкьуннал Мажлисрал депутат Имам Яралиевлухь ва проект бартдигьаврихлу.
