Март зурул 24-нний ­«Дагестан» РИА-лий хьунни ВацI­лул хозяйствалул ­комитетрал председатель Вагьаб АьбдулхIамидовлул пресс-конференция.

Байбихьулий ванал балжину бувсунни Ахттиял райондалий Хрюг тIисса шярава­ллил чIаравсса вацIлуцIух цIу ларчIсса иширая.
ЦIу лещан дуллай бивкIун бур 300-ннийн бивсса инсантал. Чялишну гьуртту хьуну бур кIанттул агьали, вацIлул къаралчитал, МЧС, МВД.
– ЦIу зунттул бакIъялавайсса кIанттурдацIух ларчIун душиврийн бувну, хасъсса техника ишла дан захIматну бия, инсантал канил ярагъунних, чIатIрах лещан дуллай бия. Зума дургьусса инсантуран бигьану бакъая мурчал хъиннура ппив дуллалисса цIаращал талан. ЦIу ларчIун дия 22,6 гектарданийх, – тIий ур Вагьаб АьбдулхIамидов.
Ванал бусласимунийн бувну, вацIрацIух цIу ларчIсса чIявуми ишру инсантал сававну хъанай бур. Хъуннасса нигьачIаву дуссар кьаркьсса урттуцIух цIу щаврия. Му багьана ­хьуну бур Ахттиял вацIлуцIух цIу лачIаврингу.
Ссуттихунмай ччувччусса вацIлул кIанттурдай бугьан тIий бур ттарлил мурхьру. Укунсса балардая мюхчан шаву мурадрай, «Беспилотные авиационные ­системы» национал проектрал лагрулий Дагъусттаннал ласун тIий дур 12 дрон. Ми дакъассагу, «Экология» проектрал лагрулий вацIлул къаралчитурахьхьун дулун тIий дур цIу лещан дайсса 7 техника. «Экологическое благополучие» тIисса цIусса национал проектрал лагрулий тIурча, цIу лачIунсса нигьачIаву хъу­ннасса кIанттурдай бишин тIий бур 80 камера. Зувива камера бишинтIиссар 2026-ку шинал. Гьарица шинах региондалий цIу дуккан дуллантIиссар 262 гектар вацIрал.
Андриана Аьбдуллаева