Ларгсса нюжмардий Тверь шагьрулий Лиза Чайкинал цIанийсса музейраву Дагъусттаннал культура, багьу-бизу, миллатрал лаххия, канил пагьмурду ккаккан буллалисса выставка тIиртIунни «Орнаменты и отражение» тIисса цIанилу.

Ва выставкалий ккаккиялун дишинсса экспонатругу Дарбантуллал музей-заповедникрал фондравассар.
Выставкалийн бавтIцири барча буллай, сенатор, Федерациялул Советрал комитетрал председательнал хъиривмур Людмила Скаковскаял кIицI лавгунни, Дагъусттаннал агьалинал ляличIисса культуралий тамаша буллалисса ва даву дусшиврул арарду цIакь дуваву мурадрайсса душиву.

«Аьрасатнал Федерациялул субъектру – халкьуннал творчествалул ва жура-журасса культуралул мяйжаннугусса мяъданни. Дагъусттанналмур кIану личIиссавар ва мяъданналуву. ЦIакьссар. Тверь ва Дарбант цанницIун ца бавхIуну бу­ссар Тверьдал ккупIас Афанасий Никитиннул аьрххилул. 1468-ку шиналсса ванал Тверьдаясса аьрххилул ххуллу нанисса бур Дарбантливгу. ИчIаллил кьай-кьуй, этнографиялул хъус, миллатирттал лаххия, вай цимур-ца Дагъусттаннал культура ва тарих аьч буллалисса, тIитIлатIисса кIулар», – увкунни ванил.
Ххуйсса гьурттушинна дунни выставкалий Дагъусттаннал диаспоралул, вайннавух лакралгу. Тверьдал областьрал Росимуществалул Федерал агентствалул управлениялул хъунама специалистну зузисса Ваччатусса Наида ЛухIуевал бувсунни агьалинал хъуннасса къулагъас душиву выставкалух.

«Выставкалийн бавтIци­риннал хъуннасса къулагъас дия бартбисурттах, Оьргърал усттартурал дурсса арцу-мусил затирттах, Бархъаллал тIахIунттах. Дарбант шагьрулул архитектура, гьайкаллу ккаккан дуллалисса 25 суратгу дия, аьвзалзаманнул ва уттисса Дарбант цачIу бивхьуну, дахханашивуртту ккаккан дуллалисса. Выставка тIитIлатIисса кьини бия чIявусса хъамал, Тверьдал областьрал мажлисрал депутатътал, личIи-личIисса идарарттал каялувчитал. Бия областьрай­сса Дагъусттаннал вакилталгу, Дарбантуллал музейрал фондрал вакил МахIаммадгу (фамилия дакIний къалирчIунни). Вай циняв, нагу хIалану, Дагъусттаннал тарихрая, багьу-бизулия, аьдатирттая буслай бивкIру, гъан хъанай, суаллу буллалисса бия. Чансса бакъая Дагъусттаннайн экскурсиялий биян ччисса гъирарал выставка ккаккан бувкIру тIиссагу. Ххуй дирзунни вай­ннан Дагъусттаннал халкьу­ннал къавтIавурттугу. Циняв рязину бия. Вагу Дагъусттаннал цIа-кьини ххуй дуллалисса давур, сенатор Людмила Николаевнал увкусса куццуй, уттигу ца дусшиврул ламур», – тIий бур Наида.

КIицI къалавгун битан къахьунссар, Наида Тверьдайсса Дагъусттаннал диаспоралул ца яла чялишмур вакил бушивугу, ванил сипталийнугу тамансса мероприятияртту дувайшиву. Ва выставка зунтIий дур апрельданул 19-ннийнин.

ПатIимат Рамазанова