Ххуллурду оьрмулул (аьрщарал) туннурду тIисса дюрхъусса лащан баву хьхьичI щил бакIравун дурхссарив къакIулли. Мяйжаннугу, лавхьхьунугу бикIай ххуллурду аьрщарал туннурдаха, хаснува архния ва лахъния бурувгсса чIумал. Ялун бурувгсса лащаву дакъа, вай ххуллурдайх инсаннал оьрмулун чара бакъа аьркинмургу щаллу хъанай дур, инсаннал туннурдавух оьрмулун чара бакъа аьркинсса оьтту щурущисса кунма. Туннурдаха лавхьхьусса бур аьраххуллия КIундив гьаз хьуну нанисса ххуллугу.
ВицIхъиял махIлалийгу, Лакрал райондалийгу ца яла хъуннамунин ккаллисса КIундиннал шяраву цал унугу хьунан бакIлавайсса, дуламанттура-дуламантту дусса ххуллу дакIнийссар. Марххала бувсса чIумаллив, баргъ ххуйну къащайсса гьаннил чулийхсса ххуллийх машинартту шяравун къалавхъсса, ВицIхъав кьабитан багьсса ишругу шайссия цал-цал. Тти, ахиргу, байбивхьунни ва ххуллу бакьин буллай.
Ххуллул лахъишиву дур 5 километра. Ва бакьин баврицIунгу, ламул реконструкциялуцIунгу дархIусса давурттал подрядчикну дур «Биг-Сервис» ООО. ЦIанасса чIумал ва компаниялул техника щириркIуну зий дур, нигьачIисса дуламантту, къумасса кIанттурду гьарта буллай, кIива машина куннил чIарах кув буккансса, гъарал ва марххалттанул щинну гьансса куц буллай. Ахирданийгу бичинтIиссар ххюл, цанчирча ча-чунгу бакIлавайсса зунттал ххуллийх асфальт бутIин пайда бакъану тIий. Вай давуртту ва шинал август зурул ахирданий щаллу хьун аьркинссар.
МахIаммад МахIмудовлул КIундиннал шяраваллил администраторну зий кIира шинни. Шикку зун учIайхтува, вагу, шяраваллил депутатъталгу хъирив бувккун бур, аварий тагьарданийсса ламул реконструкциягу, ххуллул ремонтгу дуваншиврул, багьайсса аьрзагу чивчуну, аьркинсса документиртталсса буллай.
– Райондалул администрациялул бакIчи Юсуп ХIамидовичлуйн бувкру, ва ишираву кабакьу бува тIисса тавакъюращал. Ваналгу, Автодорданул Лакрал райондалийсса управлениялулгу жуцIун кабакьу бувунни. Ххуллул аьмсса утташиву дикIантIиссар 6,5 метра (4 метра – машинартту заназимур кIану). Ххуллий буссар совет заманнайва пIякь учин буван най бивкIсса ххялларисса кIану, вагу букьантIиссар. Шяраваллил депутатътурал ххуллу буллай зузисса бригадалунсса дукралулгу, цайми-цайми масъалартталссагу бунни. Шяраваллил инсанталгу бур чIарав бацIлай. Барчаллагьссар. Хъунмасса барчаллагь учин ччай ура шяраваллил депутатътурахьгу, махъсса инсантурахьгу, – тIий ур МахIаммад МахIмудов.
– Шяраваллин чара бакъа аьркинсса даву дур. Ва ххуллу ччяни зия хъанай бия, тиха-шиха щинну най, хаснува гъараллу чIярусса чIумал. Шикку участокрал начальникну ур цаятура ва цайминная жаваблувшинна дусса жула лакку оьрчI, Инишатусса Амир Амиров. Ххаллилсса бригада бур, хъинну ххуйну цалла давугу дуллай бур, – буслай ур шяраваллил ва райондалул депутат Пазир Узданов.
– Цумур шяравунсса бунугу, ххуллул тагьарданух бурувгун шяраваллил бакIчигу, жяматгу шяраваллий дакI цIуцIисса бусса-бакъасса бувчIайхьунссар. ВицIхъату КIундив нанисса ххуллу бур ча-чунгу бакIлавайсса. ХьхьичIва ва ххуллий, ва шанбавчIуну, зий шанма хъамитайпа бикIайссия. Миннайн ремонтертал учайва. Ва ххуллул ялтту уккунугу ия Амсар Маммаев. Ххуллул ци тагьар дурив ккаккан зуруй кIийла хъунама мастергу учIайва, кIинттул икIу, гъинттул икIу, ххуллий зузиминнахьгу гьарца кьини зий мяйра ссят дуван аьркинссар тIий. Мяйра ссятрайсса зузи кьинилун лавхьхьусса харж бакъанугу вайннал, Гъумук хьусса гьарца совещаниялий КIундиннал ххуллул мастертурая цIа дайва. Мяйжаннугу, вайннал кIинттул ххуллийх микI бакьин къабитайва, марххала чIатулттах бахьлай, марххала баслан бикIайхту, дирххун аьрщи-щама, ххуллийн бичлай, – буслай ур КIундиннал Культуралул къатрал директор Даниял ХIажиев.
Шикку дакIнин бичин ччива хьхьичIва ххуллий зий бивкIсса усттартал, вайннавух дикIайссия ттул буттал нинугу, аьпа биву, Залму ХIажиевагу. Ванил ххуллий зий дурссар 30-нния лирчусса шинну. Ванищал зий бивкIссар Чачар Маммаева ва ПатIимат МухIабуттаева.
Бадрижамал Аьлиева
