Ларгсса нюжмардий Оьруснал театрдануву Дагъусттаннал БакIчи Сергей Меликовлул паччахIлугърал наградартту дуллунни «Каспий» батальондалул аьралийтуран. Ванал кIицI лавгунни, оьттух бюхттулсса тарих чичлачисса батальондалул вирттавран президент Владимир Путиннул лахъсса кьимат бивщушиву.

Вара мероприятиялий па­ччахIлугърал наградартту ду­ллунни цаймигу хьхьичIунсса инсантуран. Луганскаллал Халкьуннал Республикалул цIа­ниятусса «За благодеяние» тIисса ХIурматрал лишан ду­ллунни СВО-лул Аьра­сатнал цалчинсса Виричу НурмахIаммад ХIажимахIаммадовлул ниттин, МахIачкъалаллал 54-мур школалул директор Сапижат Мазаеван.
«ТIайламур бусан, хар-хавар бакъасса ишну хьунни ва награда. Барчаллагьрай бура нара ду­ллалимунин укун лахъсса кьимат бищаврихлу Луганскаллал Республикалул бакIчи Леонид Пасечниклуйн. Луганскалий хъанахъи­мунил ялув буруккинттарайсса, рахIатсса оьрму дузал хьуну ччисса инсантуран асар хъанахъи­ссар Леонид Ивановичлул чIарав ацIаву, цIакь хъанахъиссар хъинмунийнсса вихшала. ЛичIинува барчаллагь тIий бура Сергей Меликовлухь, СВО-лий гьуртту хъанахъиминнах ва вайннал кулпатирттах мудангу къулагъас душиврухлу, регионнал дянивсса дусшиврийсса арарду цIакь дуван буллалисса хIарачатрахлу», – увкунни Сапижат Мазаевал.
Жугу дакIнийхтуну барча буллай буру щалвагу билаятрал хъаннин-ниттихъан яхIлил эбратну, лишанну хьусса Сапижат ­Мазаева. Уная чани ккакканнав!

ПатIимат Рамазанова