Вай гьантрай Дагъусттаннал Огнилив хьусса, хасъсса аьралий операциялул гьурттучитуран хас дурсса, ДЗЮДО-рал Республикалул турнирданий уттигу ххув хьунни Хъусращиял шяравасса СилахIуттиннул арс Хучбар Сулиев. Турнирданий ванал, 5 муттаэнайн данди увккуну, цалчинмур кIану бувгьунни.
КIицI лаган, хъунмасса хIал къавхьунни Хучбардул МахIачкъалалив ГъазимахIаммад АхIмадовлул цIанийса Олимпий резерврал спортшколалул дуллалисса дзюдорал первенствалийгу цалчинмур кIану бувгьуну.
Хучбар дуклай ур С.М. Оьмаровлул цIанийсса МахIачкъалаллал 1-мур гимназиялий 3-мур классраву. Ххюра шинаву айивхьуну ур ва дзюдорайн занай. ЧIавасса оьрмулий Хучбардул дзюдорал турнирдай, чемпионатирттай хьхьичIунсса 12 кIану бувгьуну бур.
Гьуртту хьуну ур ва мукуна Аьрасатнал Виричу, авиациялул генерал-майор Суламбаг Оксановлул аьпалун хас дурсса регионнал дянивсса дзюдорал турнирданий, ЦIуссалакрал райондалий хьусса хасъсса аьралий операциялий къучагъну жанну дуллусса дагъусттанлувтурал аьпалул первенствалий. Ингушетиянал республикалий «Экажево» тIисса Олимпий резерврал спортшколалул дзюдорал турнирданий гьуртту хьуну, Хучбардун приз хIисаврай дуллуну дур велосипед. ЧIава спортсмен кIийла гьуртту хьуну ур СВО-лий аьралий бурж бартбигьлай виричуну жан дуллусса полициялул капитан, «Ястреб-Каспий» СОБР-данул оперуполномоченный Султанов Муртазал аьпалун хас дурсса, «АхIмадхан» тIисса дзюдорал клубрал дуллалисса турнирдайгу. Хучбар ур унгу-унгусса спортсменнал хасият дусса, итххявхсса, гьунар бусса оьрчI.
Спортсменнал ларсъсса цумур-духьурчангу ххувшавриву тренернал бияла хъунмассар. Спортсменнал ххувшаву — му тренерналгу ххувшаву хъанахъиссар, мунал пишакаршиврул, бюхъулул барашиннану хъанахъиссар. ЧIава спортсмен хIадур уллай, кьянкьа-кьурчIи уллай хъунмасса захIмат бихьлай ур ванал тренер, Дзюдо-рал, спортивный ва боевой Самбо-лул спортрал мастер, ЦIуссалакрал райондалиясса Сурхай Сурхаев.
Хучбардул нину-ппу дакIнийхтуну барчаллагь тIий бур Сурхай Сурхаевлухь ва «АхIмадхан» ДСЮШ-рал директор Сергей Аьлимовлухь.
ДакIнийхтуну барча уллай, чIа тIий буру Хучбардун дуккавривугу, спортравугу тIайлабацIуртту!
Имара Саидова
