Мартрал 10-нний МахIачкъалалив Ирчи Къазахълул цIанийсса кучалий «Инт» кафелуву хьунни фонд «Кази-Кумух» тIитIаврил хIакъиравусса мажлис.
ХьхьичIва баян бувну бивкIсса куццуй, маркIачIан ссят 5 хьусса чIумал батIлан бивкIунни Лакрал райондалул шяраваллал вакилтал, увкIунни сайки 50 инсан.Зума риртун махъ, байбивхьунни ххал бигьлай батIаврил хъунмур масъала.
Фонд тIитIаврил ва мунил каялувчину Тамирлан ХIабибуллаев итаврил хIакъираву махъру лавхъунни Лакрал миллатрал ва культуралул автономиялул председатель Муса Оьмаровлул, ГьунчIукьатIрал шяраваллил имам Шагьабуттин Къушиевлул, Щардал администрациялул бакIчи Мирослав Ибрагьимовлул ва цайминнал.
Махъру лавхъминнал бувсунни Лакрал райондалий, шяраваллаву щаллу буван аьркинсса масъаларттая. Вайннал тIимунийну, масъалартту дузал буваншиврул, давуртту бакIуйн дуккан даншиврул, фондрал каялувчину итан аьркинну бур давуртту дуван бюхъу-бажар бусса, жаваблувсса инсан. Мукунсса ур Тамирлан. Ванал ттинингу чIалачIи бувну бур цува ми цинярда тIалавшинну бартдигьин бюхъайсса ушиву.
Мирослав Ибрагьимовлул аьщуйн щун бувну увкунни: «Жува хIакьину увчIин аьркинссар фондрал каялувчи. Жува буру цинявннан аьмсса ца даву дуллай, шиккун бувкIун бур цала-цала жяматрал чулухасса вакилтал. Агарда Тамирлан фондрал каялувчину итан циняв рязину бухьурча, ва итанну, цаймигу пикрирду бухьурча, цIанава инкар хьун аьркинссар. Ванан кIулссар даву цукун дачин дуван аьркинссарив, аьркин хьурча, жувагу бацIанну ванал чIарав, шайманал шаймур буллай. ЗахIматсса давуртту бакIрайн ларсун дур Тамирланнул, цIуллу аннав цув, Занналгу кабакьиннав ванацIун», – увкунни Мирославлул.
Яла баян бунни, Рамазан барз къуртал хьувкун, вава куццуй бавтIун, фонд тIитIаврил презентациягу дурну, дузал буван аьркинсса цаппара масъаларттаягу ихтилат бувантIишиву.
ХIасан Аьдилов
