Мартрал 7-нний КIундиннал дянивмур даражалул школалий хьунни щалагу Аьрасатнал «У войны не женское лицо» тIисса цIанилусса чувшиврул дарс. Ва хас дурну дия Буттал кIанттул цIанийсса Хъунмасса дяъвилул чIумал талатаврил майданнал цIаравугу, къинттуллух захIматрал фронтрайгу чувшивуртту ­дуллай бивкIсса хъаннин.

Щаллагу дунияллий мартрал 8-нний кIицI лагайсса Хъаннил кьинилул хьунийн дуклаки оьрчIал дакIнин бивчуна цIарду кIулссагу, къакIулна ливчIссагу хъами-вирттал: медсестрахъул, разведчицахъул, снайпертал, сапертал, колхозницахъул… Ласругу, уссурвалгу, арсругу аьрайн тIайла бувккун, цивппалу ливчIсса, хъунисса захIматшивурттайн данди бавцIуну, арамтурал даймургу, хъаннил даймургу дуллай, оьрчIалссагу буллай, ­ххишала дакъа хъуннасса гьиву цалла заэвсса хъачIунттайн ларсъсса хъанния бувсунни оьрчIал ва кьини, дурккунни вайннаха чирчусса асар хьунсса назмурду. Ххалаххигу, ххарачIанигу, хьюла-чIатIагу кани­хьну ичIувагу, къурувгу, Хъун ­дяъвилул фронтирттайгу совет хъаннил дурсса хъуни-хъунисса виричувшивурттал Бюхттулсса Ххувшавриву хъунмасса бутIа бивхьуссар. Вайннал дурмур махъа нанисса цимирагу никиран эбратну диркIссар ва дикIантIиссар.
Бадрижамал Аьлиева