МахIал арс Аьбдуллагь увну ур СунбатIлив хъудугьул ­кулпатраву. Аьбдуллагьлул Гъумук къуртал бувну бия, махъ ­педучилищалийн реорганизоват бувсса, ШКМ (школа крестьянской молодежи). Аьбдуллагь муаьллимну зий ивкIссар СунбатIуллал ва ЧIяйннал школардай.

Ва ия ххаллилсса муаьллимгу, «мусил кару» дусса чарил, тIаннул усттаргу. Ккуллал райондалий ЧIяв, Ваччав ванал ­бувссар кIаланнайсса цIувцIучарил ламурду. ШавкIуллал шяраваллил чIарахсса неххайхсса хъун ламул кIалан цайми усттартураща бахIин къахъанай, ванал мугу бавхIуну, ламугу бувну кьабивтссия. Ваччав майданнив ­бувссар тяхъашивуртту дувайсса сахIна. Мунийсса цIувцIучарил бюрнагу, мозаикалий дирхьусса В. И. Лениннул суратгу муналли дурсса. ЧIяйннал школалул майданнив дуссар Хъун дяъвилий жанну дуллусса учительтурансса ва дуклай бивкIминнансса ­гьайкал. Школалий зузисса ­Аьбдуллагьлул, шиккува ­дуклакисса хъунама арс МахIал ва чIивима арс Тарзаннул укра дурссия му гьайкал.

Хъун дяъвилий ливтIусса СунбатIуллал 6 адаминангу, 6 хъамитайпалунгу клубрал хьхьичIсса паркраву Аьбдуллагьлулгу, арснал Тарзаннулгу ххаллилсса гьайкал дацIан дурссар.
Аьбдуллагьлул, Кураллавун лавгун, щарссанищал ва арсурвавращал, бартбисуртту щашлан лавхьхьуссар. 1982-ку шинал «СССР-данул 60-летие» тIий чивчусса бартбису ­щавщуна вайннал.
Аьбдуллагьлул ялагу шяраву агьали яхъанансса тамансса къатри дурссия. Инсаннал дувайсса даврин ххуйсса кумагчигу, маслихIатчигу ия. Лакрал халкьуннал фольклор датIлай уссия, амма аьпалувун ­лавгуна ччяни.

Аьбдуллагьлул арснал МахIал Москавлив Тимирязевлул цIанийсса Сельхозакадемия къуртал бувссар ва ­тамансса хIаллай зий уссия Къизлардал райондалий ппиринж бугьай совхозрал хъунама инженерну. ЦIана МахIачкъалалив ишбажаранчину ур. ЧIивима арс ­Тарзан, Москавлив Архитектурный ­институтгу бувккуну, зий ­уссия, ччяни аьпалул хьунни.
Ттул пикрилий, бучIир Аьбдуллагьлунгу агьалинан чIалачIисса кIанай ца гьайкал ягу бюст бацIан бан.

МахIмуд Аьлилов,
ш. СунбатIул