Вай гьантрай Дагъусттаннал региондалийсса «Справедливая Россия – За Правду» партиялул советрал председатель Камил Давдиев ва ванал хъиривчу Марат Аьлияров бивунни ­Москавуллал Бурденкол цIанийсса госпитальданий хъин хъанахъисса хасъсса аьралий операциялул гьурттучи Назим ОьмаевлучIан.

Мобилизация баян бувния шийнай, ватандалул мурадру буручлай, хасъсса аьралий операциялий гьуртту хъанахъисса Хъусращиял шяравасса ­Назим, ччаннайн кIусса щаву дирну, хъин хъанай ур госпитальданий.
Камил Давдиевлул цIувххунни Назимлухь хъуниминнал чулуха ци кумаг аьркинну буссарив. Назимлун ва цинявппагу къуллугърал бурж бартбигьлагьисса аьралийтуран чIа увкунни цIуллушиву, ччясса мутталий азигу лавгун, цала нитти-буттачIан зана шаву.
Шиккува кIицI лаган, СВО-лий гьуртту хъанахъисса Назимлуя жун уттинингу цикссагу ххуйсса хаварду баяйва. Ванащал архIал аьралий бурж бартбигьлай бивкIсса жула лаккуоьрчIру буслай бия, Назим хъинну захIмат ххирасса, канива букъаккайсса пиша бакъа­сса, ­аьралийтуращалгу авкьусса, хъинну ххуйсса инсан ур тIий.
Оьрмулун къулайсса шартIру дакъасса окопирттаву ялапар хъанан багьсса аьралийтал, Назимлул хIарачатрайну ттукIгу бувцуну, чIумуйну яхъанансса шартIругу дузал дурну, лайкьсса даражалий аьралий бурж бартбигьлай буссия. Окопирттаву ялапар хьунсса шартIру дакъар тIий, аьрзирдайсса аьралийтурахь командир ивкIун ур: «Бургияра, ва дагъусттанлувнал дурсса давурттах, вагу зу ­кунасса аьралийчуври, ваная эбрат л­асияра», – тIий.