Укунсса цIанилу Гъумучиял библиотекалий хьунни Ниттил мазрал кьинилун хас дурсса мероприятие.

Му хIадур дурну дия биб­лиотекалул зузала ПатIимат ЛухIуевал. Выставкалий бивхьуну бия лакрал шаэртурал ва чичултрал луттирду.
Мероприятиялий гьуртту хьунни 7 — 9-ми классирттал дуклаки оьрчIру ва вайннахь лакку мазрал дарсру дишайсса учительницахъул Барижат Умариевна ва Роза Оьмаровна.
Патимат ЛухIуевал бувсу­нни ниттил мазрал агьамшиврия. ЧIурчIав дурунни маз хъанахъи­шиврий миллатрал ттарцIнугу, дакIнугу, маз бухлагаврищал миллатгу бухлаган тIий бушиврий.

Роза Сулаймановал бувсу­нни лакку мазрайсса чичру хIасул шаврия, лакку мазрал цалчинсса грамматикалия, му цуппагу сакин бувну бушиврия 1860-ку шинал, Дагъусттан Аьрасатнавун бувхния махъ, П. К. Услардул. 1866-ку шиная шийнмай Услардул алфавитрай байбивхьуну, Гъумук цалчинсса дуниявийсса школалий лакку мазрай дарсру дихьлай байбишаврия.

Амма, чIун лагайхту, алфавит ишлашиврува бувккун бур.
1928-ку шинал ххалгу бивгьуну, цIакь бувну бур ХI. ХIажибагьовлул, Л.И Жирковлул, А.Щамххаловлул, Н.Ф.Яковлевлул сакин бувсса цIусса латин хIарпирдайсса лакку алфавит.
Ванила бувсунни Дагъус­ттаннай цалчин миллатрал мазрай итабакьлакьисса кказит хьушиву «Илчи» кказит, бувсунни «ЦIубарз» журналдания, лакрал литературалул гьану бивзсса Саэд ХIабиевлуя.
ОьрчIащал дунни лакку мазрайсса викторина, ми кIул бунни къакIулсса мукъурттищал. Дук­лаки оьрчIал дурккунни лакку мазрахасса назмурду.

Лажин хIадур дурссар
Зулайхат ТахакьаеваЛ