Медициналул идарарттай зий, агьалинал цIуллу-сагъшиву дуруччаврил ххуллий хъунмасса захIмат бивхьусса инсанни Ккурккуллал шяравасса ПатIимат Дибирова (Магьдиева).

Цила захIматрал ххуллий ванил бувагу 2 идара баххана бувну бур, кIивагу кIанайгу каялувчитуран ва архIал зузиминнан бусраврай бивкIун бур.
Бувну бур ПатIимат Ккурккуллал шяраву Магьихъал агьлу-авладраясса Аьбдулвагьаблул ва Аслибикал кулпатраву. Ряхва оьрчIава ПатIимат чIанма-чIивимур бур.
Ккурккуллал школалий 8 классгу къуртал бувну, ва дуклан бувххун бур Дагъусттаннал медициналул училищалул фельдшертал ва акушертал шай­сса факультетрайн. Мугу ххуйну къуртал бувну, зун бивкIун бур МахIачкъалаллал Хъаннил 3-мур консультациялий. Зувиллий ххюра шин дурссар ПатIиматлул ва ца кIанай зий.
ДакIнил аьчухсса, инсаннан кумаг бан ччисса ПатIимат ххирая ваничIа сияхIрайсса цинявппагу хъаннин. ПатIимат бур цила бикIайкунсса медициналул зузала, дакI цIуцIисса, цIими-аякьа дусса.

Даврия махъсса чIумалгу, бигьалагай кьинирдайгу, цIухху-бусу буллай, бакIцIуцIаву дуллан бикIай ва цила пациенткахъай.
Шинну ларгун махъгу, чув-бунугу ккаккарча, бувчIуну, гъан хъанай, барчаллагь тIун бикIай цила чIумал ванил бувсса медициналул кумаг дакIнийсса, мюнпатсса маслихIатругу бучIи лявкъусса душру.

Мунияр махъ, 20-хъайсса шиннардий (2000-ку шиная байбивхьуну), ПатIимат зий бур «Тарнаир» санаторийлул («Каспий» санаторийлул идарарттавун бухлахисса) поликлиникалий. Шиккугу цила даву ххирасса, жаваблувшиву дусса ПатIимат тIалавну ва хIурматрай бия. ВаничIан буххан бавцIусса пациентъталгу мудан чIявусса бикIайва. Цаягу рязи акъа къауккайва. ПатIиматлул рахIат буккан бай къашайшалт, хаснува оьрмулул бугьарасса инсантал, медициналул кумаг бувну бакъассагу, нахIусса мукъуйнугу.
– Пишалул ххуллий чIявусса затру лавхьхьуссар, лахьхьинсса гъира ттувувагу бия, – тIий бур ПатIимат.

Ттунма хIисав шай, чIявусса оьрчIру бусса кулпатраву тарбия хьусса оьрчIру хъунмур­чIин яхI бусса, хIарачат бу­сса, захIмат ххирану аьдат хьу­сса бикIай. Мукунсса бур ПатIи­матгу, цинявппа ванил уссур- ссу­гу. Цала хIа­ра­чатрайну оьр­мулу­ву лайкьсса кIану бувгьусса. Хъ­нама уссу Аьбдуссалам ур философиялул элмурдал кандидат, чичу. КIилчинма уссу КьурахIажи, экономикалул элмурдал кандидат, 80-ку шиннардий уссия Дагъусттаннал университетрал таний хъинну сийлийсса совет машлул факультетрал деканну.

Тамерлан Дагъусттаннал лайкь хьусса строитель ур. Ссу ТIагьират Аьрасатнал халкьуннал просвещениялул отличникри, Аьрасатнал аьмсса кIулшивуртту дулаврил хIурматлувсса зузалар. Назима тIимур ссу жагьилсса оьрмулуву дунияллия лавгунни. ХIайп, жагьилсса оьрмулуву дунияллия лавгунни ПатIиматлул кIиягу арсгу. Оьрмулул къаувччуну аьпалухьхьун лавгунни ласгу. ЦIана арснал щарнищал архIал бур, арснал оьрчIру тарбия баврил чIири-хъунсса хъаргу цийнна лархъун. ПатIиматлул бур 3 оьрчIал оьрчI, минналгу бур 3 оьрчI.

ЧIявусса ккавкнугу, дакI къалп къархьусса, аьчухсса, гьарнащал хIал бавкьусса ПатIимат ххирар цинявннан, гъан-маччанан, дустуран, даврил уртакьтуран, щалагу Ккурккуллал жяматран.
Вай гьантрай ПатIиматлул 80 шинал юбилей дия.
ДакIнийхтуну барчагу буллай, цинявппагу ва ххираминнал цIания чIа тIий бура ПатIиматлун цIуллушиву, гьарица ишираву тIайлабацIу, ххаришивуртту ва хъиншивуртту.

Андриана Аьбдуллаева