Февральданул 20-нний Каспийскаллал педагогический колледжраву (хьхьичIвасса архитектуралул ва строительствалул) хьунни хасъсса аьралий операциялий ватандалул ххуллий чувшиврий жан дуллусса ва идара хьхьичIунну къуртал бувсса Бижитуев Кьурбанисмяил Шагьабуттиннул арснал аьпалул ула тIитIлатIисса батIаву.
Шикку гьуртту хьунни ДР-лул кIулшиву дулаврил ва элмулул министрнал хъиривчу ХIажимурад МахIаммадов, Каспийск шагьрулул мэрнал хъиривчу ХIусайн Ункилов, педагогтал, студентътал ва виричунал гъан-маччами.
Кьурбанисмяил Бижитуев ххуйсса ккаккиярттащал колледж къуртал бувну махъ лавгун ур аьралий бурж лахъан. Къуллугъ буллай ивкIун ур Нижегородскаллал областьрай танкардал аьралуннаву. 2020-ку шинал контракт чирчуну, къуллугъ буллай ивкIссар Къарачай-Чаргаснаву гранатомётчикну.
2022-ку шинал хасъсса аьралий операциялий ккаккан дурсса чувшивурттахлу лайкь хьуну ур Жуковлул ва Суворовлул медальлан.
2023-ку шинал июльданий Запорожскаллал областьрай Гуляйпольский райондалий Приютное тIисса шяраву ца талатавриву чувшиврий жан дуллуну дур. ИвкIуну махъ лайкь хьуну ур Чувшиврул ордендалун.
Мероприятиялий ихтилатру бунни ХIажимурад МахIаммадовлул, ХIусайн Ункиловлул, колледжрал директор Назир МахIаммадовлул, Лакрал райондалул администрациялул пишакар МахIаммад Гадаевлул.
Аьпалул улттуя пардав дуркьунни виричунал ниттил Рабият Бижитуевал ва ХIажимурад МахIаммадовлул.
Мероприятие къуртал хьунни аьпалул улттуцI тIутIив дишаврийну.
Муния махъ Назир МахIаммадовлул виричунал ниттихьхьун буллунни Барчаллагьрал чагъар.
Зулайхат Тахакьаева
