Февральданул 22-нний Аьрасатнал хъуншагьрулий, Миллатирттал къатраву, Москавливсса Дагъусттаннал Культуралул центрданул ва Мариян Илиясовал цIанийсса «Дараччи» фондрал сипталийну дунни Ватан дуруччул кьинилун хасъсса мероприятие.
Ванийн оьвкуну бия СВО-лул 40-лунниха ливчусса гьурттучитурайн ва вайннал кулпатирттайн, Аьрасатнал Вирттаврал ниттихъайн.
Мероприятие дайдирхьуна Аьрасатнал халкьуннал артист Олег Газмановлул балайлухун сахIналийсса экрандалий Буттал КIанттул цIанийсса Хъунмасса дяъвилул ва СВО-лул Вирттаврал суратру ккаккан дуллалисса видеолия. Хасну ва мероприятие дачин дуван МахIачкъалалия оьвкуну бувкIун бия Дагъусттаннал культуралул лайкь хьусса зузала, «Дагъусттан» ГТРК-лул лакрал редакциялул хъунмур редактор Тамара Закарьяева. Ванил кутIану бувсуна мероприятиялул сиптачитурая ва сакиншинначитурая, кIицI лавгуна, Буттал КIанттул цIанийсса Хъунмасса дяъвилул ппурттуву кунма, цIанакулгу Аьрасатнал гьарца регионнай агьали, ца хьуну, Ватандалул мурадру буруччин гьаз хьушиву ва залдануву бушиву ярагъ кIунттил бувгьуну нацизмалущал талатисса хIакьсса вирттал.
«Дагъусттан» МЦК-лул президент, Москавуллал авиациялул институтрал авиациялул-ракетардал системалул кафедралул профессор, академик Арсен ХIусайновлул, бавтIцири барча буллай, увкуна: «Дагъусттаннал агьалинал хъунмасса бутIа бивхьуссар СВО-лий ва хIакьинусса кьинигу бихьлайнма буссар, жагь аьрай, жагьгу къинттуллух, захIматрал фронтрай. Дагъусттаннал 13 Аьрасатнал Виричу СВО-лул ппурттуву хьусса уссар, уттигу къучагънан вай гьантрай Мусил ЦIуку булунтIиссар, мугу барча уллантIиссару. На икрамрай бакI кьус ритлай ура залданувусса Вирттаврал ниттихъал хьхьичIгу, аьралийтурал хьхьичIгу».
Цалчинмур ранграл капитан, полковник ХIусман-ХIажи Сулаймановлулгу бувсуна, цува ххарину ушиву Ватан дуручлачиминнащал, СВО-лий гьуртту хъанахъиминнащал цачIу-чIарав щяикIан, хавар бусан. «МукьцIаллий мукьра шинал лажиндарай аьралий къуллугърай уну, ттун чIявусса билаятирттайн иян багьуна, амма цумур билаятрайн иярчагу, ттуща кьянкьану учин хьунссар, дунияллий бакъассар жулвамур армиялияр цIакь бусса. Бакъассар жулвами саллатIтураяр чувшиву дусса ва сивсусса. Бакъассар чувчIав жулвами кунма аьралий иширттачIа яхIлувсса хIаписартал ва саллатIтал, жулва душмантуралгу ва хIучча дакIний битича», – увкуна ванал.
Тамара Закарьяевал, медициналул элмурдал доктор, профессор Астемир Шайхалиевлухьхьун ва аьралий хIакин, медициналул къуллугърал лейтенант Муса ХIажиевлухьхьун махъ булуннин, кIицI лавгунни, СВО-лий цIунцIияртту дирсса саллатIтурай операциярду буллалиминнавух, реабилитациялул ка-кумаг буллалиминнавух вай кIиягу мудан хьхьичI ххуттай бушиву ва, хIакинтурал кумаг бакъагу, вайннал госпитальлай хъин хъанахъиминнан аьркинмунил кумаг бувайшиву.
«На зуйн, аьралийтурайн, барчаллагьрай ура, зу фронтрай буну тIийру жу ичIува рахIатну бусса, жул оьрчIругу паракьатну школардайн заназисса. Зун ххюцIалунниха ливчусса билаятирттал армиярдайн данди буккан багьунни, цивппагу ярагъуннил балгусса, яла лаваймур даражалийсса техника дусса. Зу нигь дакъа кьянкьану бавцIуну буру, зул чувшивул, сисаврил, яхIлил жувун пахрулул асарду бичлай бур. Зух ичIувацири ялугьлай буссар, Ххувшавугу ларсун, зу цIуллуну шаппа-шаппай бучIаннин. Буттал КIанттул цIанийсса Хъунмасса дяъвилул ва СВО-лул тапаватшиву дуссар, цIунцIияртту, щавурду, цаймигу хIакъи-хIисавртту хIисав дурну. Уттисса цIунцIияртту, щавурду личIисса журалул дур. Сеченовлул медициналул университетраву, Бурденкол госпитальданий захIматсса цIунцIияртту дирминнан шайкунсса кумаг бувансса даражалий сантирайн даву дуртун дуссар, реабилитациялул кумаграл давугу дюхъан дурну дуссар. Жулва аьмсса мурад – Ххувшавур, зу чара бакъа зана хьунтIиссару Ххувшаврищал, жу зуйн барчаллагьрай ялугьлантIиссару», – увкунни Астемир Шайхалиевлул.
«Дараччи» фондрал хъунмур Гульшан Хасаевал увкуна: «Ниттихъан арсвавраяр язисса ва хьхьичIунсса цичIар дакъассар, буттахъан- буттал аьрщараяр. Жулва чиваркIуннал илданун ккаккан бунни, Ватандалул мурадру буруччин жанну ххира къадайсса вирттал бушиву, ниттил накIлищал архIал чувшиврул бутIа ххишалану бивсса бушиву. ЯхIлувсса ниттихъул хIакьину, цанма цуксса захIматну бунугу, щавурдай каругу дирхьуну лавай бизлай, оьрмулул иширттавух чялишну хIала бухлай бур, ххувшаву гъан дуллай бур. Зул чувшиврул ва яхIлил кьимат жучIа бюхттулну буссар ва бикIантIиссар. Ва ялагу, ва гьашинусса Ватан дуруччайманал шингу, хIакьинусса ва давугу – так Вирттаврал аьпа учаву ва уттаваминнахь барчаллагь учаву мурадрайсса даву дакъар, укунсса давурттал ялун нанисса никираву цIакь буллалиссар патриот асарду, Ватандалухсса ччаву куртIгу, цIакьгу дуллалиссар. Ва мурадрай жулва биялалиймур жувагу буллалиссару».
Вава фондрал Москавливмур филиалданул хъунмур, «Дгъусттан» МЦК-лул президиумрал член Мариян Кьаландаровал кIицI лавгуна, Ватан дуручлачими ва лайкьсса арсру тарбия бувсса ниттихъул Аьрасатнал пахру, жулва цинявннал ца кулпат хъанахъишиву. «Зу – жулва билаятрал гужгу, кутакгу, цIакьгуру. Зу чара бакъа цIуллуну зана хьияра, жун зу дакьаврил чIумалгу аьркинссару, жугу хIарачат банну гихунмайгу зул чIарав бацIан», – увкуна ванил.
Ккаккан дурна «Дагъусттан» МЦК-лул ва «Дараччи» фондрал фронтран, щавурду дирсса аьралийтуран кумаг буллалисса лахIзардащалсса видеосуратгу.
Бюххансса, асар биян буллалисса ихтилатру бувна Вирттаврал ниттихъалгу. НурмахIаммад ХIажимахIаммадовлул ниттил Сапижат Мазаевал ва МахIаммад Исбакиевлул ниттил Марина Исбакиевал барчаллагь увкуна, цала арсурваврал ва вайннацIун цинявгу вирттаврал аьпалул хIурмат буллалисса давурттахлу.
Шиккува кIицI лаганна, Дагъусттаннал диаспоралул вакилтал Марина Исбакиеващал архIал хьхьичI кьини бившиву ванил арснал, Виричу МахIаммадлул гьаттай тIутIив дишин ва увччусса Мытищиливсса хIатталлив.
Залдануву бия СВО-лий ливтIусса цаймигу къучагътурал ниттихъул: Кьурбанова Гьами, Рамазанова Надежда, Гуршаева Наима, Аьлиева Асият ва СВО-лийсса арснал нину Аьлидибирова Маржана.
Авадансса дия концертрал программа. Дагъусттаннал халкьуннал артистка Рукьият ХIамзатовал увкуна «Жу вил арсруру, Аьрасат» тIисса, Владимир Григоряннул макьангу, махъругу чивчусса, балайгу, къумукь мазрайсса балайгу. Шиккува кIицI лаганна, сайки циняв мазурдийсса балайрду бивкIшиву. Дагъусттаннал халкьуннал артист Шамсуттин Къаплановлул ва Тамара Закарьяевал увкуна Абачара ХIусайнаевлул «Та гъидайдихьулул гъилисса гьантрай» тIисса балай. Артур Готфридлул увкуна Расул ХIамзатовлул «Кьурукьругу», цаймигу балайрду. Даргири мазрай — МГУ-лул аспирантка Аьлиева Наидал, яру мазрай – Багьауттин Ибрагьимовлул. Бия машгьурсса балайчиталгу гьуртту хъанай: Аьрасатнал лайкь хьусса артист Сергей Плотников, щаллагу дунияллул халкьуннал дянивсса конкурсирттал лауреат ва Гран-При ларсъсса Поля Ива ва цаймигу. 2014-ку шинал Донецкалий командировкалий унува жан кьурван дурсса Вагьаб Багьауттиновлул душнил Мисай Багьауттиновал ва Карина Вагьабовал оьрус мазрай увкуна аьралий балайрду. Расул ХIамзатовлул «Аьрасатнал саллатIтал» тIисса поэмалувасса парча бувккуна Нураттин Кьурбановлул. Назмурду дурккуна Саид Байдулаевлул (мукьра шинавусса), ХIамза Ибрагьимовлул (мукьра шинавусса), Амина ХIусайновал (ххюра шинавусса), Рустам Амировлул (урчIра шинавусса), Идая АхIмадовал (ацIния кIира шинавусса), Мариян МахIаммадовал (урчIра шинавусса). Дурккуна назмурду СВО-лий гьуртту хьуминнал: майор Евгений Лошкиннул ва лейтенант Рубен Налбандяннул. КъавтIавуртту дурна Дагъусттаннал культуралул лайкь хьусса зузала ПатIимат ХIайбуллаева каялувшиву дуллалисса «Рассвет» ансамбльданул ва «Кавказ Дэнс» ансамбльданул (худрук Диана Аьлиева).
Ахирданий мероприятиялул спонсортурал цIаниятусса хъинсса ссайгъатру буллуна СВО-лул гьурттучитурангу, тIутIал кацIурдищал архIал СВО-лул Вирттаврал ниттихъангу, гьурттушинна дурсса оьрчIангу. Хъамал хъин битансса ххуйсса урцIигу хIадур дурну дия спонсортурал. Культуралул программа ва ссупрагу лахъи лавгуна. Аьралийтал дакIнийхтуну бусрав хьуну бия Москавлия, лагма-ялттусса шагьрурдая чIявусса хъамалгу бавтIун, Дагъусттаннаягу щаллу-ккурккисса делегациягу бувкIун, лавайсса даражалий мероприятие тIайла дуккаврия. Майор Евгений Лошкиннул, барчаллагьрайсса махъ лахълай, кIицI лавгуна, ва так цахавасса хIурмат ккаккан буллалисса даву дакъашиву, дазу дакъа Ватан ххирасса инсантурал аьралийтал лахъа-хъун баврийну Ватандалул цIа-кьини бюхттул дуллашиву. Ва барчаллагьрал калима духьунссар Москавливсса дагъусттанлувтурал ва «Дараччи» фондрал душваврал дурсса дугърисса даврин ххуйсса ва багьавайсса кьимат бищаву.
ПатIимат Рамазанова
