Вихьуллал школалий хьунни хасъсса аьралий операциялул гьурттучи, Аьлил арс Оьма Чариновлущалсса хьунабакьаву. Аьралийчунал дуклаки оьрчIахь бувсунни дагъусттанлувтурал ккаккан дурсса къучагъшивурттая.

– Зунмагу чIалай бухьун­ссар цукунсса чувшивуртту дуллалисса жагьилтал буссарив жула, вайннал гьарица кьин­сса гьунардайну жува бух хьун къабацIайссару. Укун кьянкьасса аьралийтал буссаксса, дакI дарцIуну ура Ххувшавугу жулла чулий душиврий, – увкунни Оьма Чариновлул.
Ватандалул мюхчаншиву дуруччаврил масъалартту гьаз хьусса, мобилизация баян бувсса ппурттуву, хIакьсса патриот ушиву исват буллай, хасъсса аьра­лий операциялий гьуртту хьун лавгун ур Оьма Чаринов. 2023-ку шинал ванайн кIусса щаву дирну, хъунмасса хIаллай уссия госпитальлай хъин хъанай, уссия тамансса хIаллай реабилитациялийгу. Азилавгун, ччаннай авцIуну махъ, Оьма зана хьуну ур аьралий гьалмахтурачIан.
ХIакьинусса кьини вирттавран ккаллиссар Оьмагу, ванаха лавхьхьусса, кьянкьасса хасиятру дусса, хасъсса аьра­лий операциялий гьуртту хъана­хъисса циняппагу жула чиваркIгу. Барчаллагьри, оьрмурдан нигьачIаву дунугу, вас-ццах бакъа Ватандалул мурадру буручлачисса арсвавран лайкьсса тарбия дуллусса нитти-буттан.
Имара Саидова