Февральданул 24-нний Къяннал шяраву Аьрасатнал Виричу НурмахIаммад ХIажимахIаммадовлул гьаттайн бавтIунни ва дунияллия лавгсса кьини.
Виричунал аьпа абад бан бувкIун бия Ккуллал райондалул администрациялул делегация, райондалул шяраваллал бакIчитал ва жямат.
НурмахIаммадлул оьрмулул ххуллиясса, чувшивриясса ихтилат бунни райондалул бакIчинал хъиривчу Анатолий Давдиевлул.
Аьпалул митинграй махъ лавхъунни Виричунал ниттиуссил Малик ХIажимахIаммадовлул.
БавтIцириннал, алхIамгу бувккуну, дуаьрдугу дурну, дакIнин увтунни Аьрасатнал тарихраву абадлий цIа кьариртcса Ватандалул къучагъсса арс.
ДакIнин бутан, хъунама лейтенант НурмахIаммад ХIажимахIаммадов Украиннавусса хасъсса аьралий операциялий цала цува пIякь учин увссар лагма лавгсса неонацистътурацIун. 2022-ку шинал мартрал 3-нний Аьрасатнал президент Владимир Путиннул ХIукму бувссар НурмахIаммад ХIажимахIаммадовлун Аьрасатнал Виричунал цIа дулун.
Аьрасатнал президентнал «На лаккучура, дагъусттанлувра, чачанна, ингушра, оьрусра, татаринна, жугьутIра, мордвинна, аьсатIинна» тIисса махъру ливчIссар тарихраву.
