Хасъсса аьралий операция байбивхьуния шихунмай МахIачкъалалив, Хуршиловлул (Юсуповлул) цIанийсса кIичIираву штабгу тIивтIуну, волонтертурал аьралуннан бувсса кумаграл хIат-хIисав дакъар. Ччарча къертту щашлай, ччарча дукрарду шахьлай, шиккува къуш бивщуну бур ва кIичIираву ялапар хъанахъими ва лагма-ялттуми. «Хуршиловцы» тIий, вайнная къакIулсса акъар. Цал-цал шиккусса ттула дустурал оьвкуну, нагу лагара штабрайн. Шикку мудан щириркIуну дур даву. Кув шахьлай, кув щашлай, кув дахIлай, дукьлай.

Цайми миллатирттал, жяматирттал буллалимур хъисвагу чIиви бан ччай бакъара, амма шиккугу жула лак цинявннаяр ялтту бувккун чIалан бикIай. Шагьрурдая ва районная, личIи-личIисса организациярттая нех дирхьуну най бур шиккун аьрайн биян бансса кумаг.
ЦIана аьралийтурачIан ссайгъатру биян бан лавгминнавух буссия цалчинсса гьантрая шихунмай волонтершиву дуллалисса, 2-мур ЦIувкIратусса жула Садаят МахIаммадовагу. Ва ванил ряххилчинсса аьрххир хасъсса аьралий операция нанисса кIанттурдайнсса. Аьмну ва штабрая 33-чин лавгссар аьралийтуран гуманитар кумаг биян бан.
КIицI лаган, Садаятлул кIийлла дурссар аьралийтуран кумаг баву мурадрайсса ихIсандалул концерт. Ванил цила парникирттава буллусса, дачIи тоннаксса помидордая штабрал душваврал маринадру, салатру дурну тIайла дуркссар аьрайн.
– Барачатсса аьрххи бия. Аьралийтурангу дуллуну, цайминнайх дачIинссагума дуки-хIачIия дия жучIа. ЧчатI шашай заводрал бия чIявусса печенье ва булкарду. Аьралийтурайхгу бавчIуну, ливчIсса къуршив, махъунмай нани ххуллий пострай бавцIуминнан, заправкарттайминнан, укунмасса инсантуран буллай буссияв. Жу ми биян барду Донецкалий­сса, Запорожскаллал чулийсса позициярттайн, Широкий Яр шяраву­сса точкалийн. Яла Токмак шагьрулия арх бакъасса кIанттурдайн цайнма аьралийтурайн оьвкуну, бачIарду, – буслай бур Садаят.
ЛяличIинува кIицI лаган ччива ва аьрххилун хъунмасса гуманитар кумаг бувсса Карашрал ва ЧIарттал шяраваллал жяматру.
ЧIарттал шяравасса Аьйшат Къунаевал (ванил хьхьичIвагу арцуйнусса ххуйсса кумаг бувссия) гьан бунни аьралийтуран хъунмасса аккумулятор. Мукунмасса ссайгъат бия Арсен ва Зарина АхIмадовхъал кулпатрал чулухагу. ХIажи Бадруттиновлул дуркIунни 50 кило ницIал, Хайруттиннул (ва цувагу Авгъан дяъвилул ветеранни) буллунни кьакьан бувсса хъунмасса хIайван.
Му бакъассагу, ЧIарттал жяматрал дартIунни 115 азарда къуруш. Миннуя аьркинмур ласун 60 азарда къуруш дуллунни аьралийтурачIан нанисса Ума Аскерхановахьхьун. Гайминнух вивра бансса ххю-ххюра килорду нагьлил, ницIал, туртул, 20-хъайсса килорду уттуллул, 30 кило яла ххуйми курагул, гьивхьхьул ва цаймигу кьакьан дурсса ахъулссаннул, мукунна аьралийтурансса гъилисса лултту янна ларсунни. КIицI лаган ччива муданма кумаг буллалисса Загьидат ХIажиева. Ва цуппагу жуна ххуйну кIулсса художник Калеб Шмидтлул нинур.
ЧIарттаяр махъун къабагьунни Карашрал жяматгу. Карашрал къутандалийсса школалия бувкIунни биялсса аьрайн-гьавккури, яхша ва цаймигу дука-хIачIанмур. Бия аьралийтал яла ххари шаймур ссайгъатгу – дуклаки оьрчIаясса дакIнийхтунусса чагъарду. Миннул ялун ххуйсса кумаг бувкIунни шагьрулийсса карашрал чулухагу. Булатхан ва Аида Оьмаровхъал кулпатрал дурну дия 150 литра холодецрал.
КIицI лаган ччива ихIсан­далул давурттавух мудан хIала бикIайсса «Балхар» кафелул заллу Банавша, ванил ссу ПатIимат ХIажибуттаева. «Мадина» тIисса ПатIиматлул кафелувур циняр дукия шархьсса.
Ва кьини аьрайн нанисса ссайгъатирттавух бия Ккулату­сса ПатIимат АьбдурахIмановал чулухассагу: дарваг аьрайн-гьавккуртталгу, карщив нисиралгу.
Дур жула лакраву ляличIисса дугъришиву, чумартшиву, сахаватлувшиву. Муданма кунма, утти­гу кьини дурксса чIу­мал жулами цинявннаяр хьхьичIун ливчунни. Хуршилова кIичIиравусса штабрайн лакрал штаб учирчангума къабяйкьинссара. Цалчин­сса гьантрая шихунмай, шайнал шаймур буллай, шикку зий бу­ссар КIувратусса Исмяил ва Мисиду Гьаруновхъул, ЦIуссаккуллал шяравасса Ххадижат АхIмадова, ЧIаратусса Сабрижамал Буттаева ва чIявусса цаймигу лак.
ЦIуллушиву дулуннав, буллалимур чирину бацIаннав!
Андриана Аьбдуллаева