Ватан дуруччайманал кьинилул хьунийн райондалул школардай сакин дурну дия хIакьину хасъсса аьралий операция нанисса кIанттурдая кутIасса чIумуй бигьалаган бувкIсса ва, щавурду дирну, хъин хъанахъисса аьралитуращалсса хьунабакьавуртту.

Муния бувсунни хасъсса аьралий операциялул Ветерантурал Лакрал райондалийсса ассоциациялул ва «Память гор» ДРОО-лул хъунама Юнус Эфендиевлул.
Дуклаки оьрчIал хIадур дурну дия ватан дуручлачиминнайн билаятрай дакьаву ва мюхчаншиву дуручлай бушиврухлу барчаллагь ва хIурмат баян буллалисса оьвчавуртту.
Укунсса хьунабакьавурттал кумаг буллалиссар жагьилсса никираву ватандалухсса ччаву куртI дуван, ларгсса ва ялун нанисса никирттал дянивсса дахIаву цIакь дуван, мунищала архIал цала хъуними уссурваврал чумартшивриягу кIул бан.
КIундиннал школалий сакин дурну дия хасъсса аьралий операциялул волонтер Низами Умаровлущалсса хьунабакьаву, цувгу, хIакьину тикку талатиминнан гуманитар кумаг батIин кумаггу буллай, аьралийтурачIан биян буллай заназисса, цувагу ва школалул выпускник.
Низамил бувсунни цуксса барчаллагьрай буссарив аьралийтал дуклаки оьрчIал тIайла буклакисса кумаграхлу – дакIнийхтунусса чагъардая тIайла хьуну, цала каруннил бувсса окопирттаву ишла бансса майлул чирахъирттайн, дуклаки оьрчIал ниттихъал дакIнийхтуну дурсса нацIу-кьацIулийн бияннин.
Дуклаки оьрчIал ва учительтурал барчаллагь увкунни Низамихь хасъсса аьралий операциялий талатиминнал чIарав ацIлацIисса хъин-хъинсса давурттахлу.