Январь зуруй оьрмулул 69 шинаву дунияллия лавгунниДагъусттаннал лайкь хьусса хIакин, машгьурсса хирург, ХIасаннул арс ХIасанаьлиев Шамил. Ва ШавкIуллал шяравасса, мина Гъумук дирхьусса кулпатравассар. Щалва оьрмугу гьан бувссар республикалул агьалинал цIуллушиврулсса буллай, хирургну, урологну ва медициналул учреждениярттал каялувчину зий.
Лакрал райондалул агьалинангу ва ххуйну кIулссар райондалул азарханалул хъунама хIакин хIисаврайгу. Ванал школа къуртал бувну бур Гъумук, яла Ленинградрай Лихачевлул цIанийсса химико-технологический институт. Мурманскаллал хьхьирил флотрай аьралий буржгу бартбивгьуну, зана хьуну ур Дагъусттаннайн. Дуклан увххун ур Дагъусттаннал медициналул институтравун. Дуккавриву итххявхсса ухьувкун, 1991-ку шинал къуртал бувну бур Лениннул стипендиягу ласлай. Курсрал старостанугу ивтун ивкIун ур бюхъу-бажар бусса студент. Цавагу мукьва бакъа Мединститут къуртал бувсса Шамил ХIасанаьлиев кафедралий преподавательну ацIан увну ур.
Гъумук райондалул хъунама хIакинну зунсса инсаннах луглай бусса хавар хьуну, Мединститутрал хъуниминнал Шамиллул кандидатуралух къулагъас дуван маслихIат бувну бур. Шамилгу, бакIрайнласу бувну, арулла шинай райондалул азарханалул хIакинну зий ивкIун ур. Яла — МахIачкъалаллал Советский райондалул ЦIуллушиву дуруччаврил управлениялул хъунама хIакинну, Дагъусттаннал медициналул университетрал учебно-медицинский центрданул консультациялул ва диагностикалул отделениялул хIакин-урологну.
«Шамил ия цалва ужагъ, тухум, цува зузисса кIану чIюлу буллалисса яргсса личность. Цайминнан кумаг буваншиврул оьрмулул ххуллийх дакI дарцIуну нанисса. Ва ия, хIакиннал пишалийн дакI тIайлашиврул ва инсаншиврул эбрат, ххуйсса хирург, уролог ушивруцIун, дакI-аьмал хъинсса, цалва лагма-ялттуминнан, цайнма бувкминнан дакIцIуцIаврий кумаг бувайсса», – укун чичлай бур, ва дунияллия лагаврил жижара буллай, республикалул медициналул кказитрай ванал даврил уртакьтал, гьалмахтал.
«Цува дунияллия гьаннин тIиссакссагу, агьалинан консультацияртту дуллай, кумаг буллан икIайва, гьарцаннан кумаг бан ччисса ия, цучIав махъаллил къаувайва, ванайн «мискинминнал духтур» учайссия. Ца азардания цIуххирча, щаллусса лекция буккайссия. Хъинну хъирив лавну медицина лахьлан икIайва, кIулшивуртту куртIгу, цIакьгу дуллай, луттирду кIунттива къабукьайва. ВаначIан хаснува Аьрасатнал регионнаясса чIявусса дазурду ядувулт бучIайва», – тIий бур Шамиллул кулпат Саният. Ва Цалчинмур ЦIувкIратуссар, цуппа Шамиллун нясив шаврил кьиссагу укун буслай бур: «Шамилхъул ва жу чIаххул бияв. Шамиллул ппу ХIасан Гъумук театрданул администраторну зий ивкIссар, нину Зумурижат — кIиккува азарханалий медсестрану. Ттул нину-ппу Гъумукун багьаврил ишгу укун хьуссар. Ттул ниттиуссу Мажид, Бакуй Милицанал школа къуртал байхту Гъумукун зун увкIссар. Ниттил нину-ппу ччяни ливтIуну, ниттиуссу Мажид ппушиву дуллай ивкIссар ниттин ПатIиматлун, ва цащалва Гъумукун бувцуссар. Ттул ппу МахIаммадрамазан увссар Ашттарханнай, Гурьеврай школа къуртал бувссар. Буттал ппу МахIаммад дунияллия лагайхту, ваналсса буллай ивкIссар хъуннабавал уссу Оьмахан, аьрабрай дурккусса адамина. Ванал цачIана увцуссар ппу. Ставропольлал политехнический институтраву связьрал факультет къуртал байхту, ппу Гъумукун связьрал даврийн увтссар. Гъумук бакIрайн багьссар нину ва ппу цаннайн-ца».
Саният цуппагу ФСБ-лул медициналул частьрай 23 шинай хъунмур медсестрану зий бивкIун бур, цIанагу тиккува поликлиникалий лабораториялий зий бур. Шамиллул ва Саниятлул кIива душ бур, хъунмур душ Надежда, буттал ва ниттил касму язи дургьуну, хIакин хьуну бур, МВД-лул санчастьрай УЗИ-лул хIакинну зий бур, Оксана тIимур душгу органнай зий бур. Шамил кIулми буслай бур, ванал хIурмат, цува зузисса институтраву бакъагу, щалвагу Дагъусттаннал медициналуву зузиминнал дянив хъунмасса бия, ва лакгу, Лакку кIанугу ххирасса ия, мудан лакрал тарихрал, культуралул, магьирлугърал хъирив авцIуну икIайва, жяматийсса оьрмулул иширттавух чялишну хIала уххайва тIий.
«Гъинттул гьар шинах Лаккуйн лагайссияв, гужну кIиялу ххирасса ия, кувний, буттал аьрщарахсса мякь багьувкун, ттухьрагу ссихI къадурккун лавгун лякъайва», – тIий бур Саният.
Зийнува, зун ччай унува, Лакку билаятрах мякьнува лавгунни дунияллия Шамил ХIасанаьлиев. Ванал аьпа хIурматрай ябулланссар кулпатгу, наслугу, аякьалийсса хIакин хIисаврай ванал дакIнил хъиншиврул бутIа бивциригу.
ПатIимат Рамазанова
