Февральданул 14-нний МахIачкъалалив, А. Карповлул цIанийсса Шахматирттал школалий, лахъа-хъунсса даражалий хьунни ДР-лул лайкь хьусса учитель Айгунов МахIаммад Ризауттиновичлул аьпалун хас дурсса шахматирттал турнир.
Ва кьини бусравсса хъамаллуравух бия ДР-лул Халкьуннал Мажлисрал депутат ХIажимурад Маллаев, МахIачкъала шагьрулул бакIчинал хъиривчу ХIаким Ашиков, «Единая Россия» партиялул фракциялул депутат МахIаммад Загьидов, МахIачкъала шагьрулул Спортрал, туризмалул ва жагьилтуращалсса даврил управлениялул хъунама Мурад МирзахIажиев, МахIачкъала шагьрулул Советский райондалул бакIчи Арсен Айдиев, Республикалул клиникалул азарханалул хъунама хIакин АхIмад Аьлиев, жяматийсса ишккаккулт, цIанихсса спортсментал ва СМИ-лул зузалт.
Турнирданул сиптачиталну ва сакиншинначиталну бувккунни МахIаммад Айгуновлул арс, МахIачкъала шагьрулул 49-мур школалул директор Аьбдулкарим Айгунов ва гроссмейстер Жакай Жакаевлул каялувшиндаралусса Дагъусттаннал шахматиртал федерация. Айгуновлул дуллалисса даврил чIарав бавцIунни шагьрулул администрация, Спортрал, туризмалул ва жагьилтуращалсса даврил управление.
Шахматирттал бяст-ччаллаву гьуртту хьунни республикалул школардаясса 120 оьрчIая хIасул дурсса 30 команда. Шанма гьантлул мутталий най бивкIсса бяст-ччаллаву ххув хьусса шахматистътурал команда гьуртту хьунтIиссар Республикалул турнирданий. Шикку цалчинсса кIану бувгьусса шахматистътал гьантIиссар Сочилий хьунтIисса Аьрасатнал турнирданий гьуртту хьун.
Турнирданий бия Дагъусттаннал, СКФО-лул ва Европанал чемпионатирттай хьхьичIунсса кIанттурду бувгьусса чIава шахматистътал.
Шахматирттал бяст-ччал байбихьлахьисса ва гьурттучитал барча буллалисса ихтилат бунни Жакай Жакаевлул.
– ХьхьичIва-хьхьичI барчаллагь учин ччай ура буттал цIа лайкьну дуручлачисса, ялун нанисса никиран эбратрансса давуртту дуллалисса Аьбдулкарим Айгуновлухь. Цинявппагу нитти-буттал мурад, оьрчIан лайкьсса тарбиягу дуллуну, ми оьрмулул ххуллийн тIайла бацIан баву дур. Аьбдулкаримлул буттаща бювхъуну бур ххаллилсса арс тарбия уван.
Аьбдулкаримлул ппу чIярусса шиннардий уссия Бабаюртуллал райондалийсса Сангардал дянивмур даражалул школалул директорну. Мунал каялувшиву дуллалисса ппурттуву Сангардал школа буссия республикалул хьхьичIунсса школардал сияхIрай, – увкунни ванал.
– Укунсса турнирдайри, цIу-цIусса командарттащалгу кIул хьуну, шахматирттай буккаврил опыт ва техникагу лахьхьайсса. Гьавас бувххун шахматирттай буклакинийри ххувшавугу ласайсса. ОьрчIру спортрахун машхул баврия хъунмасса хайр буссар.
Шиккува бусан, Аьбдулкарим Айгуновлул гьарица шинал, буттал аьпа абад баву мурадрай, лавайсса даражалий сакингу дурну, тIайла дуккай личIи-личIисса спортрал фестивальлу, турнирду. Уттигъанну ванал итабавкьунни цала буттал сакин буллай ивкIсса кроссвордирттал сборник. Вай луттирдугу ванал бавчIунни шагьрулул школардал библиотекарттайх.
– Ттул ппу оьрмулухун директорну зий уссия Бабаюртуллал райондалийсса Сангардал дянивмур даражалул школалий. Буттал аьпалун хас дурсса спортрал турнир на ацIния цалчинна дуллалисса. Буттал чIун цукун лякъайссияв къакIула, ванал школалийсса ва жяматрал оьрмулувусса давуртту мудангу дузрайн дуккан дайва. Ппу тачIав кулпатрахсса къулагъасгу чан хьун къаикIайва.
Сант дирирну дунура, барчаллагь учин ччай ура, спортраву дикIу, оьрмулуву дикIу, нара дуллалисса давурттал чIарав бацIайсса цинявппагу ттула дустурахь, – увкунни Аьбдулкарим Айгуновлул.
Имара Саидова
