Февральданул 10-нний «Дагестан» РИА-лий хьунни «Яхъа­нахъу ва цайминнангу оьрму пишкаш буллалу» тIисса ихIсандалул фондрал вакилтуращалсса пресс-конференция.

ЗахIматну къашавайсса оьрчIан кумаг баву мурадрай фонд хIасул бувсса Лайла Каримовал бувсунни, ва сакин бувшиву 2012-ку шинал, 13 шинал мутталий фондрал 50 азара оьрчI хъин уван кумаг бувшиву.

ЦIубутIуй фондрал хъун­мурчIин кумаг байсса бив­кIун бур онкологиялул къашавайсса оьрчIан, яла кумаг буллан бивкIун бур цумур-цагу захI­матсса цIуцIаврил ххяппурттахьхьун биривсса оьрчIангу. «Ковидрал пандемия дайдишин хьхьичIсса ппурттуву, сайки гьар шинах, февральданул 15-нний жу лахъа-хъунну кIицI лагай­ссия Онкологиялул къашавайсса оьрчIал кьини. Ва щалла дунияллий кIицI лаглагисса кьинилул жунма дакIнин бутлатиссар, жулва лагма-ялтту жулва ка-кумаграх мюхтажсса оьрчIру бушиву. Жу хIарачат буллай буру, захIматну къашавайсса гьарцагу оьрчIан чIумуй медициналул багьайкунсса ка-кумаг баврил, аьркинсса дарурттал дузал баврил ялув бавцIуну», – увкунни ванил. Бувсунни цинма куртIну асар хьусса ца ишираягу. «МахIаммадхIабиб тIисса оьрчI уссия, таний ванан 13 шин дия. Иман дусса, чак къакьабитайсса. Химиотерапиялул ппурттуву ванан 18 ссятрайсса капельницарду дуллан бикIайва, капельница дуллалисса системагу гьаз дуллай, чак буллан икIайва. Ттул ванащал дусшиву дуссия, бияйссияв, дакI тирх учинмур буллан бикIайссияв. ХIакьинусса кьинигу итталу ур та оьрчIгу, танащалсса ихтилатгу.

МахIаммадхIабиблул ни­ттил ттухь миннат бувна: «Хъин хъанан ччай акъар, махъаллил хъанай урча, вил мукъух вичIи дишинтIиссарча, гъалгъа бувакьай», – куну. Бувссия гъалгъа. Ниттих циван вичIи къадихьлай ура, капельницарду дяличIан циван дуллай ура, хъин хьун аьркинссара тIий буссияв. «Увххунна на хъин хъанай, ттулва оьрмулий щинчIав зарал къабав, бунагьралун агьанмур къабав, исламрал циняр рукнурду бартдигьинмур буллай ивкIра, диндалул тIийкун къуццу тIий ивкIра, ттун бувчIлай бур нава дунияллия нанишиву, амма нину хIадурну дакъар на итаакьин. Ниттил буруккинттарай ура, амма чичрулун чаран бакъассар, на итаакьи уча ниттихь» тIий ия. Яла махъату ниттил бувсуна арс дунияллия лавгсса лахIзалия. «Бабай, дургу, малаиктал лехлай бур тIий ия. Чув бур, арс, тIий цIухлай дуссиявча, лагма лехлай бур тIий ия» кунни. Яла, шагьадагу дурккуну лавгуна тIива ахиратравун.

Лайла Каримова, ва бюххан­сса иширая буслай, чIурчIав дуллай бия, захIматсса асарданул бас буллай бухьурчагу, оьрчIал дакIурдил марцIшиврий, пикрирдал чаннашиврий.
Фондрал директор ва соучредитель Ххадижат Сулаймановал балжину бувсунни фондрал даврия. «Жул фондрал гьанумур кумаг даруртту ва реабилитациялул чара бакъасса оборудование машан ласавугу, реабилитациялух багьа булавугур. Арцуйну­сса, дуки-хIачIиялийнусса кумаг бувайссар жу нитти-буттахъангу, оьрчIан цанмагу. Мукунма психологтурал кумаг аьркинсса чIумалгу чIарав бацIару. Агьалинан бакъагу, фондрал кумаг буллалиссар медициналул учреждениярттангу. ОьрчIру багьайсса куццуй уква хъин баврил ялув бавцIуну буссару», – увкунни ванил. Бувсунни Республикалул Халкьуннал Мажлисрал каялувчи Заур Аскандаровлул кумаграцIух февраль зурул 13-нний А. Салаватовлул цIанийсса Къумукьнал театрдануву хьунтIисса мероприятиялиягу.
Фондрал Попечительский советрал член, туризмалул ва халкьуннал канил пагьмурдал министрнал хъиривчу Анна Безруковал бувсунни программа авадансса душиву, гьунар бусса чIава артистътурацIун, республикалул машгьурсса артистъталгу гьуртту хъанай бушиву, билетру бавххуну хьусса циняр арцу къашавайсса оьрчIру хъин буван харж дувантIишиву. «Ва вихшалдарал ва ччаврил проектри. ОьрчIан цIими чIа тIутIиминнах кунма къабуру­глай, миннал дакIурдил чаннашиву хIисав хьуну, дакIниймур бувчIуну, чIарав бацIан ччан бикIаншиврулсса», – увкунни ванил.

ПатIимат Рамазанова