Чувшиврул ордендалул заллу М. Молчановлул цIанийсса МахIачкъалаллал 46-мур школалий Росгвардиялул управлениялул «Ястреб – Каспий» СОБР-ал зузалт гьуртту хьунни совет аьрал Авгъаннава буккан бувну 36 шин шаврин хас дурсса мероприятиялий.
Бусравсса хъамал хIисаврай шикку гьуртту хьунни «Боевое братство» тIисса щалагу Аьрасатнал ветерантурал жяматийсса организациялул Дагъусттаннал отделениялул Исполнительный комитетрал председатель Иманмирза Иманмирзаев, Дагъусттаннал Жяматийсса палаталул член, «Боевое братство» организациялул региондалул отделениялул каялувчи МахIаммадрасул Сулайманов, Авгъаннаву ва Чехословакиянаву хьусса дяъвилул иширттал гьурттучи, Дагъусттаннал лайкь хьусса артист Аьбдулла Фаталиев. Школалул педагог Лайла Халиловал дурккунни Авгъан дяъвилул иширттан хас дурсса назмурду. Бувсунни чил билаятрай интернационал бурж бартбигьлай бивкIсса жула жагьилтурая. Цила ихтилатраву педагогнал кIицI лавгунни халкьуннал дакIурдиву Авгъанисттан чувшиврул ва къювулул лишанну личIантIишиву. Мероприятиялул лагрулий ккаккан дунни тай иширттая, совет аьралийтурал чувшивурттая бусласисса видеоролик.
– Укунсса мероприятиярттал чIалачIи буллай бур тарихрал гъалатIру тикрал къашаву ва ялун нанисса никирттан дакьаву дуруччаву мурадрай лавгмур дакIний битан аьркиншиву, – увкунни СОБР-ал хIаписар полициялул подполковник И. Аьбдулвагьабовлул.
Школалул директор ПатIимат Шугаибовал барчаллагь увкунни хъамаллурахь жагьилтал Ватан ххирану тарбия баву мурадрай дуллалисса даврихлу.
Андриана Аьбдуллаева