Авиакомпаниялул пресс-конференциялий

Февральданул 11-нний Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрай хьунни «Nordwind Airlines» авиакомпаниялул вакилтурал пресс-конференция.

Шикку гьуртту хьунни Ма­хIачкъалаллал аэропортрал гендиректор Николай Субботин, ванал хъиривчу Антон Маттис, ДР-лул транспортрал ва ххуллурдал хозяйствалул министрнал хъиривчу Саэд Рамазанов, журналистътал.
Антон Маттислул балжину бувсунни компаниялул даврия ва ларгсса шинал хIа­силлая. Бувсу­нни мукунма аэропортрай гъинттул чIумал дуллантIисса цIусса рейсирдая. ХIакьинусса кьини региондалий «Nordwind» авиакомпания ца яла хьхьичIунмунин ккаллину дур. Шиная шинайн гьарза хъанай бур пассажиртал. Авиакомпаниялул интнил ва гъинтнил чIумалсса расписаниялувун духлай дур 12 журасса рейсру.
– Авиакомпаниялул Москавлийнсса, Санкт-Петер­бург­лийнсса ва цаймигу шагь­рурдайн­сса рейсру дакъассагу, ххишала хьунтIиссар Калининградрайнсса, Къазаннайнсса ва Сургутливсса рейсру. АвиакомпаниялучIа чялишну зий буссар инфотурду дуллалисса идара. 2024-ку шинал ва компаниялул рейсирдай республикалийн увкIун ур 55 700 турист, – укунни Антон Маттислул.
Николай Субботиннул кIицI лавгунни МахIачкъалаллал аэропортращал зузисса «Nordwind» авиакомпания вихшала дишин­сса партнерну хъанахъишиву.
– Авиакомпаниялущал хIала-гьурттуну зузаврийн бувну, ххишала хьунни пассажиртуран тIалавсса цIусса рейсру. Дагъус­ттан туристътурал дянив машгьурну бушиву хIисавравун лавсун, вагу агьамшиву дусса ишну хъанахъиссар.
Ларгсса шинал авиакомпаниялул 3 млн пассажиртурал кьамул бувссар. Уттигу умуд бур аьдад ххишала дансса, гьамин, рекорд дишинсса, – увкунни Субботиннул. Ванал мукунма бувсунни планнаву бушиву аэропортрачIан бияннинсса муххал ххуллу бавугу.
Саэд Рамазановлул кIицI лавгунни цIу-цIусса рейсру тIитIаврийну республикалийн букIлакIисса туристътуран хъуннасса къулайшиву душиву.
– ХIакьинусса кьини МахIач­къалаллал аэропортрая инсантураща бюхълай бур, цала чIунгу харж къадурну, аьркинсса шагьрурдайн тIайланнасса рейсирдай лехлан, – увкунни ванал.
Шиккура «Nordwind» авиакомпаниялул дунни сертификатрал розыгрыш. Ванийну бюхълай бур Аьрасатнал ччимур шагьрулийн кIивагу чулухунай уква ле­ххан. Сертификат дурххунниДР-лул Информациялул ва печатьрал агентствалул каялувчинал хъиривмур Наида МахIаммадовал. Ванил сертификат хасъсса аьралий операциялул гьурттучинал ниттин пишкаш дантIий бушиву баян бунни.
Ва кьини журналистътал хьу­набавкьунни Къазанная МахIач­къалалийн лерххун дуркI­сса «Nordwind» авиакомпаниялул самолетрал экипажращал. Самолетрал бортрай рирщунни дакIний личIансса суратру.
ДакIнин бутан, 2008-ку шинал хIасул дурсса «Nordwind Airlines» дуссар Аьрасатнал хьхьичIунсса авиакомпаниярттал сияхIрай.
Имара Саидова