Вай гьантрай Щамхал поселокрай цIуну бувсса школалий хьунни Дагъусттаннал Строительствалул, архитектуралул ва ЖКХ-лул министерствалул дурсса даврил хIасиллая ва хьхьичI бивхьусса масъаларттая бусласисса пресс-конференция.

ДакIнин бутанну, «Образование» тIисса миллатрал проектрал лагрулий Щамхал поселокрай 604 дуклаки оьрчIансса кIану бусса, 3 зиву дусса школа бувшиву.
ДР-лул строительствалул, архитектуралул ва ЖКХ-лул министр Бахттияр Уллаевлул кIицI лавгунни, ларгсса шинал дурсса агьамсса давурттавасса цану хъанахъишиву шикку бувсса школа.
Республикалий гьашину 5-сса шин хъанай дур «Образование» тIисса миллатрал проект чялишну зузи дурну. Проектрал лагрулий 2023-ку шинал республикалий бувну бур 6430 оьрчIансса 16 школа, 2024-ку шинал — 7818 оьрчIансса 20 школа.
Министрнал кIицI лавгунни, ятинсса оьрчIру къатта-къушлил дузал буллалисса давурттан ларгсса шинал ххишаласса арцу итадаркьушиву. 2023-ку шинал ятинсса оьрчIру къатрал дузал буван республикалул бюджетрава итадаркьуну дур 779,1 млн арцул. Дуллуну дур 189 инсаннан­сса сертификатру.
2024-ку шинал республикалул бюджетрава вай давурттан итадаркьуну дур 825 млн 900 азарда къуруш,190 инсаннан дуллуну дур 2,8 млн лагрулийсса сертификатру.
– Цуксса ялув бацIлай бухьурчангу, Дагъусттаннай цикссагу дур кьануннава бувккун дурсса къатри. Инсантал бур дузал къадурсса къатраву ялапар хъана­хъисса. ХIакьинусса кьини республикалий дуссар къатри аьркинсса тIалавшиннарду дурурччуну дуллалисса, – увкунни министрнал.
2024-ку шинал Дагъусттаннай миллатрал проектрал ва республикалул инвестициярдал программалул лагрулий бувминнувасса ца хъанай бур Лакрал райондалийсса «ТтурчIидагъ – ГьунчIукьатIи – Табахлу» тIисса щинал дузалшиннарал объект. Бувсунни «Инфраструктура для жизни» тIисса национал проектрал кумаграйну цIу дуккан дурсса коммунал сетирдаягу.
Пресс-конференциялий гьаз бунни «Чиркей – Махачкала — Каспийск» тIисса щинаххуллийн ва МахIачкъала шагьрулул канализациярттайн багьайсса ма­съаларттугу. Щинаххуллия буслай, кIицI лавгунни 18,0 километралийхсса турбарду бивхьушиву ва строительствалун аьркинсса кьай-кьуй дузалну душиву.
Дагъусттаннал Строительствалул министерствалул тамансса давуртту дурну дур Запорожскаллал областьрайсса Михайловскаллал муниципал округрайсса объектру цIу буккан буллай.
– Михайловский округрай жу цIу буккан барду 3 школа, кинотеатр, культуралул къатри. Дакьин дурссар райондалул азарханалул котельнилул магъи. Мукунна, ремонт дурну, бакьин бувссар ОьрчIал творчествалул ва Социал хIаллихшиннардал центрду, – увкунни министрнал.
Ахирданий Бахттияр Уллаевлул Барчаллагьрал чагъарду буллунни ведомствалущал хIала-гьурттуну зузисса СМИ-рдал зузалтран.
Имара Саидова