МахIачкъалалив Республикалул 2-мур клиникалул азарханалул конференц-залдануву хьунни Дагъусттаннал цIуллу-сагъшиву дуруччаврил министр Ярослав Глазовлул пресс-конференция.

Министрнал, ларгсса шинал ведомствалул даврил хIасиллугу дурну, хьхьичIун лавсъсса ма­съаларттая бувсунни.
2024-ку шинал ЦIуллу-сагъ­шиву дуруччаврил министерствалул нацпроектирдал лагрулий щаллу дурну дур 8 региондалул проект. Миннувух дур цалчинсса медициналул кумаг баврил система лядуккан даврил, онкологиялул ва туннурдал азардащал талатаврил, медициналул организациярду лавайсса даражалул кадрардал дузал баврил, цIуллу-сагъшиву дуруччаврил республикалул первичный звенорал модернизация даврил ва м.ц.
Министрнал бусласимунийн бувну, первичный звенорал модернизациялул лагрулий 2024-ку шинал ишла бувну бур 5,3 млрд арцул. Миннува 1,8 млрд — федерал бюджетрава, 177 млн — республикалул бюджетрава ва 3 млрд ва 278 млн — цайми кIанттурдаясса (ТФОМС, Социал страхованиялул фонд). Ва проект 100-гу процентрал щаллу дан бювхъуну бур. Ларгсса шинал цалчинсса медициналул кумаг байсса организациярдан модернизациялул лагрулий буллуну бур хIакинтал ва пациентътал бувцуну занансса 158 санитар машина, ттизаманнул медициналул 733 оборудование.
ЦIуллу-сагъшиву дуруччаврил 75 объектрай гьануцIакул дурну дур ремонт. Ми хъун­мурчIин шяраваллал, районнал кIанттурдайсса идарартту бур. Бувну бур 20 амбулатория ва ФАП-ру.
Республикалий ххуйну зий дур санитар авиациягу. 2024-ку шинал санавиациялул кумаграйхчин азарханардайн иян увну ур 291 инсан, миннава 80- мюрщисса оьрчIру.
Ярослав Глазовлул кIицI лавгунни Дагъусттаннай лавайсса технологиярттай медициналул кумаг буллай бушиву, захIматсса операцияртту бан чунчIав занан аьркинну бакъашиву.
– Хирургиялул чулуха жула республикалул мадара хьхьич­Iунмай хъит куну бур. Лавайсса даражалий буллай бур эндоскопиялул операцияртту. Ларайсса технологиярттайсса операцияртту бан итабавкьуну бур 460 млн арцул. 2024-ку шинал Да­гъусттаннай бувну бур мукунсса 10 азарунния ливчусса операцияртту, – бувсунни министрнал. 2025-ку шинал Дагъусттаннал ЦIуллу-сагъшиву дуруччаврил министерствалул хьхьичIхху­ттайн лавсъсса масъаларттаву ванал кIицI лавгунни агьалинал оьр­мурду лахъи бансса чаран ля­къаву, инсаннай диагноз дишин ва му хъин ан ттизаманнул кьяйдарду ишла даву.
Бувсунни республикалул цинявппагу медициналул идарар­ттай хасъсса аьралий операциялул гьурттучитуран ва миннал кулпатирттан медициналул кумаг баврил масъала хьхьичIун лавсун бушиву. ХIакьину Да­гъусттаннай зий бур мукун­сса инсантуран медициналул ва реабилитациялул кумаг байсса хасъсса идарартту. Хъунма хIал къавхьунни ттизаманнул оборудованиялул дузалсса реабилитациялул отделение тIиртIуну. Шинал лажиндарай медициналул кумаг аьркин багьлай бувкIми мукьлий ххишала хьуну бур. 2023-ку шинал 358 инсан ивкIхьурча, 2024-ку шинал 1356 инсан увкIун ур.
2025-ку шинал «Развитие здравоохранения» паччахIлугърал программалул лагрулий Да­гъусттаннай гьануцIакул бакьин бан тIий бур цIуллу-сагъшиву дуруччаврил 124 объект.
Ихтилат къуртал хьуну махъ, гьурттучитурал суаллахьхьун жавабругу дуллуну, министрнал буллунни Барчаллагьрал чагъарду цIуллу-сагъшиву дуруччаврил сфера аьч дуллалисса журналистътуран.

Андриана Аьбдуллаева