«Дагестан» РИА-лул редакциялий хьунни «Движение Первых» тIисса щалагу Аьрасатнал оьрчIал ва жагьилтурал ккурандалул дуллалисса грантирдал конкурсрайн дагьайсса пресс-конференция.
Конкурсрал шартIирдая балжину бувсунни «Движение Первых» ккурандалул Дагъусттанналмур отделениялул каялувчи Людмила Сяидовал, ккурандалул проектирдал каялувчи Шевкет Крумовлул, «Движение Первых» ккурандалул грантру дулаврин кабакьу буллалисса отделданул пишакар Мария Милкинал.
Людмила Сяидовал бувсунни гьашину грантовый конкурс жула билаятрай дуллай бушиву шамилчин. Муний гьуртту хьун бюхъан тIий бур, жагьилтураща бакъасса, конкурсрай гьуртту хьун ччисса цайми идарарттащагу.
«ОьрчIахлу проектру ляхъан дуллан аьркин бакъассар. ЦIуххияра оьрчIахь, миннан ци ччай дурив. Жагьилтуран цIа кусса цумур-духьурчагу проект дулун бюхъайссар грантирдал конкурсрайн.
Грантирдал конкурсрай гьуртту хьунсса ихтияр дуссар, цайнува цувасса инсаннахь дакъача, идаралухь», – увкунни Людмила Сяидовал. Конкурсрайн аьрзри цукун булун аьркинссарив бувчIин бунни Мария Милкинал.
«ХьхьичIххуттай буссар цуппа пикри, яла тIурча конкурсрал сакиншинна, муний гьурттушинна дуллалисса команда ва методический маслихIатру. Гьарцагу проектрал дуссар цила ляличIишиву, цанчирча муний гьуртту хьунсса аьрзри буллай буну тIий щала Аьрасатнавасса идарарттал.
Ца региондалун ва конкурсрая хавар бухьурча, цамур регион ваний гьуртту хъанай бур цалчин. Му чIумал шайссарив жуща укунсса проектрал чIарав къабацIан, хаснува аьрзри оьрчIая букIлакIисса чIумал», – увкунни Мария Милкинал.
Грант чичаврил ялувсса цала пикрирдая ва опытрая бувсунни Шевкет Крумовлул.
«Цумур-духьурчагу сипта – му жагьилтурал цаятува бусансса сант ва кашир. На навагу гьуртту хьуссара личIи-личIисса грантирдал конкурсирдай. Дагъусттан цуппава ляличIисса билаятри, мунияту муницIун дархIусса сиптардугу дикIай ляличIисса», – увкунни ванал.
Зулайхат Тахакьаева
