Ттигъанну Ккуллал райондалул бакIчи Шамил Рамазановлуйн ва «Гудова Групп» ООО-лул генеральный директор Амму Гудовайн бувкIунни хасъсса аьралий операциялий лаккуоьрчIру аьралий мурадру биттур буллалисса 38-мур гвардейский мотострелковый бригадалул командир А. Прокуратлул цIаниясса Барчаллагьрал чагъарду.
ДакIнин бутанну, декабрь зуруй Шамил Рамазановлул ва Амму Гудовал ялув кIицI лавгсса бригадалун тIайла дурккун диркIссар 300 азарда къурушрансса связьрал сурсатру.
Барчаллагьрал чагъар буллай, хасъсса аьралий операциялий ватандалул ххуллий чувшиврий жанну дуллуминнал ниттихъал «Сила матерей» тIисса ккурандалул хъунмур Сефижат МахIаммадрасуловал барчаллагь увкунни Амму Гудовахь жула аьралийтуран бувсса кумаграхлу.
«Жула аьралийтурансса ттул кумаг – му ихIсандалул ххуллийсса даву дакъарча, тIайланмасса инсаншиврул буржри. Хасъсса аьралий операция байбивхьусса кьинилия хIакьинунин жула билаятрал суверенитет дуруччаврил ххуллий талай уссар ттул кIия ссурахъу. Илданун кIулну дикIан аьркинссар хIакьсса патриотътурал, билаятран жапасса ппурттуву мукъуйнугу, иширайнугу паччахIлугърал чIарав бацIлацIиминнал цIарду.
Ттун хъунмасса барчаллагь учин ччай бур Шамил Рамазановлухь, хасъсса аьралий операциялий талатисса жула оьрчIан чIумуя чIумуйн хъунисса арцуйну кумаг тIайла буклай ухьурчагу, муния ссихI-чIитI къадурккун, ххютулу ацIлацIисса.
Му бакъассагу, Шамил Рустамовичлул хIарачатрайну бювхъуссар мурахас уван тамансса хIаллай ВСУ-рачIа ясирну ивкIсса ккулиоьрчI, цувагу мутта къалавгун, цIунилгу зана хьунни хасъсса аьралий операциялийн. Хъунмасса барчаллагь Шамил Рустамовичлул ниттин ва буттан, арснаву инсаншиврул хасиятру тарбия даврихлу.
ЧIал къавхьуну дучIаннав жула ялун хасъсса аьралий операциягу ххувшаврищал къуртал хьуну, жула чиваркIгу сагъ-саламатну цала ужагъирттайн зана хьусса кьини», – увкунни Амму Гудовал, Барчаллагьрал чагъар кIунттил бугьлагьийни.
Чан къабаннав инагу вила миллатран, Аммуй! ТIайлабацIу архIал най лякъиннав гьарца вил захIматращал.
Зулайхат Тахакьаева
