Хъусращиял школалул дуклаки оьрчIру ва учительтал хьунабавкьунни СВО-лия отпускрай нитти-буттачIан увкIсса Кусаев МахIаммад Рафиджаннул арс. Ва ур хасъсса аьралий операция байбивхьуния шийнай аьралий бурж лайкьну бартбигьлагьисса, халкьуннал паракьатшиву дуруччаврил цIаний нигь-ццах дакъа талатисса къучагъ, жагьилсса никиран эбратрансса виричу. Ванал балжину бувсунни Украиннал аьрщарай неонацизм духлаган дуллай къучагъну талатисса аьралитурая.
– Хасъсса аьралий операциялул иширттаву жула аьралийтурал ккаккан буллай бур цивппа унгу-унгусса патриотътал бушиву. Жула жагьилтурал цимилгу тасттикь бунни кьянкьасса низам дусса, амрурду биттур бан хIадурсса аьралийтал бушиву. Укунсса къучагътал буссаксса, жула аьрщарайн душманнал ша къабизантIиссар, Ххувшавугу жура ласунтIиссар – увкунни МахIаммадлул.
ДакIнин бутан, хъунма хIал къавхьунни Казбекуллал райондалийсса Ленинаул тIисса шяравасса делегация бувкIун бивкIшиву, МахIаммадлул нитти-буттайн ва Ккуллал райондалул администрациялийн барчаллагь баян бан. Запорожскаллал областьрайсса Марьинки тIисса шяраваллия арх бакъа аьралий бигарду бартбигьлагьисса МахIаммадлул къизгъинну талатаву нанисса кIанттурдава, цала оьрмулун нигьачIаву душиву чIалай бунува, архIал талай ивкIусса гьалмахчунал жаназа дуккан дурссия.
Ватандалийн кьини дурксса чIумал ванал цимилгу исват бунни цува яхI-къирият дусса, гьалмахтурал вихшала дишин лайкьсса аьралийчу ушиву.
Жагьилсса оьрмулий хасъсса аьралий операциялул ишру ккаккан нясив хьусса оьрчIал Ватандалухсса ччаву оьрмулияр хьхьичIунну душиву тасттикь бунни. Ва хьунабакьаврий дуклаки оьрчIал суаллу буллуни къучагънахьхьун, рирщунни дакIний личIансса суратру.
Имара Саидова
