Украиннал аьрщарай нанисса хасъсса аьралий операция байбивхьусса цалчинсса гьантрая шийнмай Ватандалул мурадру буручлай бур ЦIуссалакрал райондалийсса ЦIуссаккуллал (Чараваллал) шяравасса уссурвал Ися ва Ислам Буттаевхъул. КIиягу уссу Украиннаву, ца баргълагавал, вама баргъбуккавал, дяъвилул иширттаву гьуртту хъанай ур.

Хъунама уссу, Ися, хъанай ур краповый беретрал заллу. Аьралийтурал ва росгвардиялул спецназрал хасъсса подразделениярттал пишакаршиврул ларайсса магьиршиву ккаккан дуллалисса лишанну хъанахъиссар краповый берет. Дагъусттаннай краповый берет лавсъсса аьралийтал чIявусса бакъассар, лакравурив ва цалчин Исял лавсъссар.
Ися увну ур 1993-ку шинал ЦIуссалакрал райондалийсса Чараваллал шяраву. ЦIуссаккуллал шяраву 9 классгу къуртал бувну, ва лавгун ур Нижневартовскалийн. Школагу тийх къуртал бувну, 2015-ку шинал аьралуннаву къуллугъ бан лавгун ур. Къуллугъ буллай ивкIун ур Ашттарханнал областьрайсса ракетный аьралуннаву. Учебкалий ккаккиялунну къуллугъ буллай ивкIун тIий, ванахьхьун, хасъсса удостоверениягу буллуну, ракетардаха зунсса ихтияр дуллуну дур. Яла хьхьичIунсса аьралийтуравух гихунмайсса къуллугъ буллан тIайла увккун ур Клин шагьрулийн (ПВО).
Ися гьуртту хъанай ивкIун ур Сириянавусса аьралий иширттавух. Сириянал билаятрайнгу ва вихшала дишин бучIисса, сивсусса аьралийчу уну тIий гьан увну ур. Шикку лайкь дурну дур ванал ПаччахIлугърал цалчинсса награда – Суворовлул орден.
Ися гьуртту хьуну ур Изюм, Мелитополь, Волноваха, Еленовка шагьрурдай най диркIсса талатавурттавух.
ЧIивима уссу Ислам ур ЛухIи хьхьирил флотрал пехоталул 810-мур бригадалул хъунама матрос. 2019-ку шинал Севастополь шагьрулий аьралуннаву къуллугъ буллай ивкIун ур. Аьралуннава зана хьуну махъ, цаппара хIаллай Нагорный Карабахрай миротворческий аьралуннавугу къуллугъ буллай ивкIун ур. Тичча зана хьусса чIумал, дайдирхьуну дур ученияртту. Украиннавусса тагьар оьлу­къин най чIалай, тихун хIадур буллай бивкIун бур.
Февраль зурул 24-нний вай­ннал батальон тIайла бувккун бур хасъсса аьралий операциялийн. Вайннал аьралий ххуллу баргълагавал чулийнмай багьну бур. Та яла къизгъинсса талатавуртту нанисса, гьарица чулуха ВСУ-лул аьралийтурал гьужумру буллалисса, нигьачIаву дусса чул бивкIун бур. Ислам гьуртту хъанай ивкIун ур Мариуполь ва цаймигу шагьрурду нацистътураща мурахас буллалисса талатавурттавух. Гьуртту хьуну ур «Тайфун» тIисса ххассал баврил операциялувух.
Аьралий операциялул иширттаву ккаккан дурсса чувшиврухлу Ися ва Ислам лайкь хьуну бур «За отвагу», «За мужество» тIисса медальлан. Хъунама разведчик, хъунама пулеметчик Ися Буттаев лайкь хьуну ур «За заслуги перед Отечеством II степени» ордендалун.
БувчIлай бур хIакьину цуксса захIматсса кьинирду ла­хъан багьлай буссарив СВО-лий гьуртту хъанахъисса жула жагьилтуран ва миннал махъсса нитти-буттан, кулпатирттан.
Хасъсса аьралий операция уттигу къуртал хьун бувар, жула жагьилтуран Ватандалул мурадру буручлан багьлай бур.
Хасъсса аьралий операциялий гьуртту хъанахъисса цинявппагу аьралийтал цIуллуну-сагъну зана хьуннав ссавур дакъа цахва ялугьлагьисса ичIувациринначIан.
Имара Саидова