Тарумовкаллал райондалул хъузалт ппиринж бугьлан хIадур хъанай бур. Ва райондалул Дагъусттаннай 2-мур кIану бугьлай бур ппиринж бугьаврил аьрщарал лагру хIисавну, 1-мур кIанай дур Къизлардал район.

Республикалул шяраваллил хозяйствалул ва бакIлахъиялул министрнал цалчинма хъиривчу Шарип Шариповлул Тарумовкаллал райондалул администрациялий дунни ппиринж бугьаврил масъаларттал хIакъиравусса батIаву. Ваний гьуртту хьунни райондалул бакIчи Василий Жамалов, «Управление «Дагмелиоводхоз» ФГБУ-лул хъунама Шамил ХIусманов, ДР-лул Мелиорациялул ва механизациялул управлениялул хъунама Кьурбан КьурамахIаммадов, ппиринж бугьайсса шяраваллил хозяйстварттал ва фермертурал хозяйстварттал каялувчитал.

ЦIанасса ппурттуву Тарумовкаллал райондалий 30 хозяйствалул ппиринж бугьлай бур.
БатIаврий махъ лахълай, Шариповлул бувсунни ва райондалий хъуннасса даву дурну душиву ппиринж бугьаврин хасну.
«Агарда 2009-ку шинал райондалий ппиринж бугьайсса бивкIхьурча дурагу 600 гектар аьрщарай, 2024-ку шинал му лагру гьарта хьуну дур сайки 5000 гектарданул лагрулийн диянуксса ягу 8-лла ххишала хьуну дур ппиринж бугьайсса аьрщарал лагру. Республикалий мура чIумал ппиринж бугьайсса аьрщарал лагру ххишала хьуну дур сайки 4-лла. Му хъанай дур ва райондалул хъузалтрал цала даврих къулагъас хъун даву», – кунни Шарип Шариповлул.
БатIаврий ххал бивгьунни ппиринжрал хъуру дишайсса щинал дузал даврил, мелиорациялул системартту хIадур даврил масъалартту. Министрнал цалчинма хъиривчунал бувсунни хъунмур къулагъас дуван аьркиншиву хозяйстварттавусса мелиорациялул системардах, ми ххуйну къазурча, ппиринжрал хъуру щинал дузал дуван къахьунтIий душиву.
БатIаврий махъру лавхъунни Шамил ХIусмановлул ва цайминналгу.