Цала Телеграм-каналданий Дагъусттаннал бакIчи Сергей Меликовлул бувсунни бавккуну ккаккан буллалисса цаппара иширттая.
— Цалчин, цаппара аферистътурал хIарачат бувну бур ттангъа дуван СВО-лул гьурттучитурал кулпатру хIажлийн гьан баврил сакиншиндарай. Миннал ласлай бивкIун бур къалпсса справкарду, хъяврин буллай, ласлай бивкIун лурттурасри, цаллагу дуллай бивкIун бур хIажлийн гьан ккаккан бувминнал кIанай цивппа гьаншиврул.
Буцинна цамургу мисал хасъсса аьралий операциялул темалий спекуляция дуллалисса. Бажар бусса бучIибакъулт нач-хIая дакъа дахлай бур къалпсса наградартту. Ихтилат бур «Дагъусттаннал вирттал» тIисса инсантурая. Цалчин кIул хьунни «наградалия» уттигъанну.
Ца цинявннан кIулсса лавайсса даражалул командалувасса вакилнал, СВО-лул гьурттучинал ттуйн оьвкуну, цIувххунни: «Сергей Аьлимович, республикалул лавайсса даражалул награда лайкь къавхьуминнангу дулайссарив?». Танан кIул хьуну бур СВО-лул зоналийн увагу къалавгсса, амма интернетраву цаятура цIарду дуллалисса инсаннан дуллуну душиву мукунсса награда. Га ур цимур-ца хъинну кIулсса инсан, ганан пикри хьуну бур гьарзатрал хъирив лаян…На тапшур бував му тагьарданул хъирив лаян. СВО-лул гьурттучитал хъяврин буллан ягу кьюкьин буллан жу къабитанну!
Мунийн бувну, на ихтиярду дуруччай органнайн тапшур буллай ура ми иширттал сакиншинначитурал хъирив лаян хъинну мюрш бивкIун. Дагъусттаннал Мюхчаншиврул советрал секретарь МахIаммад Бааьчиловлухь тавакъю буллай ура ва зурул ахирданийннин миннул хIасиллал хIакъираву ттухь бусан, — тIий бур Меликовлул Телеграм- каналданий.
